Şêniyên Serêkaniyê şehîd Dilşêr oxir kir

HESEKÊ

Girseya gel cenazeyê şehîd  Loey Salih (Dilşêr) ji ber Nexweşxaneya Roj a Serêkaniyê bi kerwanekî erebeyan hilda û ber bi Goristana Şehîdan a Serêkaniyê ve bi rê ketin.

Li goristanê ji bo bîranîna cangoriyên azadiyê deqeyekê rêz hate girtin. Paşê bi navê Desteya Malbatên Şehîdan Welîda Botî û ji Fermandariya QSD‘ê Cisûr Amûdê axivîn.

Li ser navê Desteya Malbatên Şehîdan Welîda Botî wiha got: “Deskeftiyên ku me bi dest xistine, bi saya xwîna şehîdên me ne.”

Welîda diyar kir ku Serêkaniyê bi mozaîka biratiya gelan û hevgirtina hemû pêkhateyên ku li ser xaka Serêkaniyê dijîn, her tim dibe armanca dewleta Tirk, lê belê gelên herême bi yekdengî van êrîşan û dagirkeriyê qebûl nakin.

Li sernavê Fermandariya QSD`ê Cisûr Amûdê jî wiha axivî: “Eger em li hember projeyên Erdogan ên zindîkirina desthilatdariya Osmanî û dagirkirina xaka Sûriyê nesekinin, dîrok me efû nake. Bi saya QSD'ê em ê hemû planên Erdogan têk bibin. Em zoz didin şehîdên xwe ku em rêya wan bişopînin heta em digihîjin armanca wan.”

Piştî axaftinan wesîqeya şehadetê hate xwendin û radastî malbatê hate kirin. Cenazeyê şehîd ji aliyê hevalên wî ve hate oxirkirin.

ANHA