Şêniyên Minbicê dagirkeriya dewleta Tirk red kirin

MINBIC

Şêniyên Taxa Rêya Cizîrê ya aliyê rojhilatê bajarê Minbicê ya nêzî Çerxerêya Cezîre ji bo şermezarkirina êrîşên dagirkeriya Tirk li ser axa Sûriyê û soza parastina bajarê xwe, kon veda.

Bi sedan ji şêniyên taxê û endamên komîte û saziyên Rêveberiya Sivîl a Minbicê beşdarî çalakiya konvedanê bûn. Di kon de, alên Meclisa Leşkerî ya Minbicê, Erka Xweparastinê û Meclisa Jinan hatin daliqandin.

Çalakiya konvedanê bi bîranîna cangoriyên azadiyê dest pê kir. Piştre, hevserokê xeta rojhilat Casim Bekar axivî û bixêrhatina beşdaran û bal kişand ser berxwedana gelê Minbicê li dijî gefên dewleta Tirk a dagirker.

Endama Meclisa Qanûnsaz a Minbicê Ezab El-Ebûd jî axivî û got Minbic bi neteweyên xwe tê naskirin û got berxwedan tekane rêya parastina destkeftiyên gel e.

Her wiha zarokê bi navê Sîrac El-Ebo jî helbest der barê berxwedanê de xwendin.

Endama Meclisa Jinan Sewsen Muslim, rêvebera xetên Minbicê Fatime Beko, bi navê Komîteya Perwerde û Fêrkirinê Elî Ebdulqadir, bi navê Ciwanên Şoreşger Eqîl Herdos û bi navê Komîteya Parastinê Usame Mihemed axaftin hatin kirin û soza parastina bajarê Minbicê dan.

Di heman demê de, ji fermandarên Meclisa Leşkerî ya Minbicê jî Enter Hisên jî axivî û got şerê wan li dijî çeteyên DAIŞ`ê dewam dike û gef nabin asteng li pêşberî armancên wan.

Her wiha Ehmed Yusif jî helbestek der barê bajarê Minbicê de got. Çalakî bi dirûşmên  şermezarkirina gefên dewleta Tirk a dagirker û parastina yekbûna axa Sûriyê bi dawî bû.

(kc)

ANHA