‘Tekane armanca me avakirina civakeke demokratîk e’

QAMIŞLO

Îro bi sedan şêniyên kantona Qamişlo û YPG`ê û YPJ`ê sersaxî ji malbata şehîd Ehmed Mistefa endamê Hêzên Erka Xweparastinê re xwest ku di pêngava Bagera Cizîrê ya rizgarkirina cihên dawîn ji çeteyên DAIŞ`ê de şehîd bûbû.

Merasîmê bi deqeyeke rêzgirtinê dest pê kir, paşê endamê rêveberiya TEV-DEM`ê ya bajarê Qamişlo Fîroşah Remedan wiha got: "Em di pêngaveke hesas re derbas dibin, gelek dewlet di serî de Tirkiye, projeya şêniyên herêma Bakur û Rojhilatê Sûriyê dike hedefa xwe, projeya ku rêya derxistina hemû aloziyên ji Sûriyê ye.”

Fermandarê YPG`ê Mistefa Qamişlo da xuyakirin ku YPG, YPJ û QSD`ê 7 salan li pêşiya hemû rêxistinên terorîst ku ji aliyê Tirkiyê ve têne birêvebirin, li ber xwe da. Dagirkeriya Tirk rasterast gefan li herêmên Bakur û Rojhilatê Sûriyê dixwe. Mistefa wiha got: “Têkoşîna me heta dawiyê dê dewam bike.”

Her wiha endama rêveberiya Kongreya Star Firyal Omer destnîşan kir ku gefên Tirkiyê bandorê li daxwazên wan nakin û wiha pê de çû: “Em ê li pêşiya êrîşên ji derve ku ewlehiya me xira dikin, bisekinin. Herêm bi saya xwîna şehîdan û lehengiya zarokên me ewle bû, bi hevgirtina pêkhateyên herêmê dê hemû gefan vala derkevin.”

‘Armanca me avakirina civakeke demokratîk e’

Bi sedan şêniyên navçeya Til Hemîs û endamên saziyên sivîl û leşkerî sersaxî ji malbata şervanê Erka Xweparastinê Mihemed Şihab re xwest ku di pêngava Bagera Cizîrê ya rizgarkirina cihên dawîn ji çeteyên DAIŞ`ê de şehîd bûbû.

Merasîma sersaxiyê bi deqeyeke rêzgirtinê dest pê kir. Paşê hevserokê Meclisa Malbatên Şehîdan Ehmed El-Ebawî bavê şehîd Xeys ê navçeya Til Hemîsê wiha got: "Bila her kes bizane ku ev herêm û hemû herêmên din ên Sûriyê rastî êrîşên hovane ji aliyê rêxistinên terorê ve hatin, lê bi saya xwîna şehîdan ev herêm hatin rizgarkirin.”

Her wiha endamê PYD`ê Silêman Ebûbekir axivî û diyar kir ku tekane armanca wan avakirina civakeke demokratîk e û wiha pê de çû: “Em wek PYD`ê û ji destpêka aloziya Sûriyê me xeta sêyemîn ji xwe re esas girtiye ji bo ku em bikarin parastina civakê bikin û hemû siyasetên li dijî civakê şermezar bikin.”

Paşê fermandarê QSD`ê Ehmed El-Kirîd sersaxî ji malbata şehîd re xwest û wiha got: “Çanda mirovahiyê ji Rojhilata Navîn dest pê kir û kete xewna dirêj. Em niha ji cîhanê re balkêş in û hêviya tunekirina nezaniyê ne. Tu ecêbî tê de tune ye ji ber ku me bi xwînê xwe ji nezaniyê xelas kir û felsefeya xelasbûna ji nezaniyê li gel me heye.”

Tê payîn ku şêniyên bajarê Qamişlo û Til Hemîsê heta seatên êvarê berê xwe didin kon.

(jo)

ANHA