‘Welatê ku bi xwîna şehîdan hatiye avdan em ji kesî re ber nadin’

KOBANÊ

Bi sedan şêniyên kantona Kobanê cenazeyê endamê Hêzên Ewlehiya Hundirîn Halim ku 22`ê Kanûnê şehîd bibû bi merasîmekê li Goristana Şehîd Dicle oxir kirin.

Li goristanê merasîm bi toraneke leşkerî hate destpêkirin. Bi navê Hêzên Ewlehiya Hundirîn a Herêma Firatê Salih Kobanê axivî û sersaxî ji malbata şehîd re xwest û got:"Gelê me bi hêza xwe şoreş destpê kir û ji bo rizgarkirina welat her deverek ji vê axê bi xwîna şehîdên me hatiye avdan.”

Ji rêveberên Kongreya Star Almaz Romî di merasîmê de got:”Şehîd ew in ên ku riya azadiyê bi me didin naskirin ji bo wê jî pêwîste em her kes xwedî li şehîdê xwe derkevin û axa me ya ku bi saya xwîna şehîdan hate rizgarkirin biparêzin û em axa xwe ji hovîtiya dewleta Tirk re ber nadin.”

Her wiha Berdevkê PYD`ê Salih Muslim jî axivî û sersaxî ji hemû malbatên şehîdan re xwest û wiha got:"Bila tu kes nefikire dema ku dev ji me berdin û piştgiriya ma nekin êdî em nikarin axa xwe biparêzin, ji ber ku dema me dest bi vê şoreşê kir em bi tenê bûn û tu kes bi me re nesekinî. Me xwe bi xwe û bi saya şehîdên xwe ev axa ji hovîtirin terora li ser rûye erdê rizgar kir. Em ê niha jî bi xwe welatê xwe ji dagirkeriya Erdogan û her kesî ku bixweze Kurdan tune bike biparêzin.”

Piştî axaftinan, Meclisa Malbatên Şehîdan wesîqeta şehîd xwend û radestî malbata şehîd kir.

Paşê, girseya gel cenazeyê şehîd Halim bi dirûşmeyên dilsoziya bi şehîdan re sipartin axê.

(sn-hh/kc)

ANHA