'Gotinên Ocalan îro li ser erdê pêk tên'

ROZANA DADO / HELEB

Rêberê Gelê Kurd Abdullah Ocalan bi komployeke navdewletî di 15'ê Sibata 1999'an de hate girtin. Dewleta Tirk a dagirker ji çend salan ve tecrîdeke giran li Ocalan ferz kiriye û hevdîtinên bi malbat û parêzeran re bi gelek hincetan red dike. Tevî tecrîda giran lê dîsa jî şênî û bi taybet jin bi fikrên wî ve girêdayî ne, ji ber ku Ocalan di dirêjahiya têkoşîna xwe de girîngî daye jinan û azadiya wê.

Rêberê Gelê Kurd Abdullah Ocalan dema ku li Lubnan û Sûriyê bû, bi gelek şêniyan re rûniştiye. Di nav de welatiya bi navê Şadya Hec Elîko jî heye. Şadya ji şêniyên Efrînê ye û du caran bi Ocalan re rûniştiye. Şadya dibêje ruxmî tecrîdkirinê lê gelê Rojhilata Navîn bi fikr û rêgezên Ocalan ve girêdayî ye.

Şadya hevdîtina xwe ya yekemîn bi Rêberê Gelê Kurd Abdullah Ocalan re bi bîr xist û wiha got: "Di rûniştina yekemîn de, Ocalan behsa vîn û hêza ku divê li gel me hebe heta em bigihîjin azadiyê kir û got tevgera azadiyê bi 6 kesan dest pê kir û bi baweriya bi armancên xwe tevger mezin bû û gelên Rojhilata Navîn pê bawer kir."

Şadya wiha domand: "Ocalan wê demê texmîn dikir ku wê şerên ku hebûna gelê Kurd dikin hedef li herêmê rû bidin, ji ber wê pêwîstiya yekitiya refa kurdî û birêxistinkirina gelê Kurd dît ku li hember dijminan bisekinin."

Şadya destnîşan kir ku Ocalan bal dikişand ser azadiya jinan û rola wê ya pêşeng di avakirina civakeke demokratîk û azad de û wiha pê de çû: "Em ê her tim minetdarên Ocalan bin, ji ber ku ew tekane têkoşer e ku bi azadiyê jinan bawer kir û ji bo azadiya wan û vegerandina hemû mafên wan tê koşiyaye."

Di dawiyê de Şadya tecrîdkirina ku li Ocalan hatiye ferzkirin şermezar kir û bang li hemû dewletên cîhanê kir ku binpêkirinên dewleta Tirk a dagirker der heqê gelê Kurd û hemû gelên Bakur û Rojhilatê Sûriyê de bi dawî bike.

(şx)

ANHA