Gelên Serêkaniyê li dijî gefên Erdogan meşiyan

Pêkhateyên Serêkaniyê meşek li dijî gefên serokkomarê Tirkiyeyê Recep Tayyîp Erdogan ên li dijî Bakurê Sûriyê li dar xist û bêdengiya navdewletî şermezar kir.

NÛÇE

13 kanûn, 2018 12:27

HESEKÊ

Piştî ku serokkomarê Tirkiyeyê Recep Tayyîp Erdogan duh di civîna li paytextê Tirkiyeyê Enqereyê diyar kir ku ew ê di nava çend rojan de êrîşî herêmên Bakurê Sûriyê bikin, îro hemû pêkhateyên Serêkaniyê meşek li dar xist.

Gelê Serêkaniyê û Zirganê bi alên YPG/YPJ’ê, posterên Rêberê Gelê Kurd Abdullah Ocalan, alên QSD’ê ji ber avahiya Mala Gel a Serêkaniyê heta Çerxerêya Şehîdan meşiyan. Di meşê de pankartên “Em êrîşên dagirkeriya dewleta Tirk ên li ser Rojava şermezar dikin” û “Tevahiya gelê Kurd û gelên azadîxwaz ji dagirkeriya Erdogan re dibêjin NA” bal kişandin.

Li Çerxerêya Şehîdan, meş sekinî û hevserokê meclisa herêma Serêkaniyê Liqman Îso axivî û wiha got: “Em îro û her wext bi hamû pêkhateyên xwe li hember êrîşên dagirkeriya Erdogan amade ne. Em ê hert im li ber xwe bidin.”

Îso anî ziman ku tu gef nikanin îradeya wan bişikînin û wan ji bajarê xwe derxin, dê heta dawiyê li ber xwe bidin û serê xwe natewînin.

Meş bi siloganên “Bijî berxwedana Rojava” û “Dîsa dîsa berxwedan” bi dawî bû.

ANHA