Şêniyên Hesekê lehengên xwe oxir kirin

Bi hezaran şêniyên bajarê Hesekê du şehîdên endamên dispilîna leşkerî û 4 şehîdên QSD`ê oxir kirin.

NÛÇE

12 kanûn, 2018 14:35

HESEKÊ

Bi merasîmeke heybet şêniyên Hesekê 4 şervanên QSD`ê Yasîn Xelef(Goran), Eyhem Çawîş(Aram), Ridwan Hisên(Basim) û Sêf El-Heyder(Ernes) û 2 endamên dispilîna leşkerî yên girêdayî QSD`ê Emîr Zêdan(Ramiyar Hesekê) û Ciwan Çivan(Berxwedan Hesekê) yên ku di Pêngava Bagera Cizîrê de şehîd bûbûn, li Goristana Şehîd Dijwar a li gundê DawIdiyê oxir kirin.

Merasîm bi deqeyekê rêzgirtin ji bo giyanê şehîdan hate destpêkirin. Di merasîmê de, Hevseroka Meclisa Malbatên Şehîdan a Hesekê Nesrin Mirî, ji fermandarên QSD`ê Welat Argeş û bi navê Rêveberiya Xweseriya Demokratîk Îdan El-Efîn, axivin.

Di axaftinan de, sersaxî ji malbatên şehîdan re hate xwestin û bal li ser destkeftiyên ku bi saya şehîdan li herêmê hatiye bidestxistin, hate kişandin.

Her wiha di axaftinan de hate teqezkirin ku bi saya şehîdan, koka DAIŞ`ê ku niha li herêma Hecînê ya Dêrazorê maye, ji holê tê rakirin.

Piştî axaftinan, wesîqeta şehîdan hate xwendin û radestî malbatên wan hate kirin.

Bi dirûşmeyên dilsoziya bi şehîdan re, girseya gel şehîdên xwe spartin axê.

(kc)

ANHA