Li Kobanê çalakiya greva birçîbûnê di roja 3`ymîn de dewam dike

Li bajarê Kobanê bi armanca şermezarkirina tecrîdkirina Rêberê Gelê Kurd Abdullah Ocalan çalakiya greva birçîbûnê di roja xwe ya 3`yemîn de didome.

NÛÇE

12 kanûn, 2018 12:05

KOBANÊ

Konê çalakiya greva birçîbûnê yê ji bo şermezarkirina tecrîdkirina Rêberê Gelê Kurd Abdullah Ocalan ji 10`ê Kanûnê ve hatiye vedan. Gelê herêma Firatê bi hemû pêkhateyên xwe berê xwe dide konê çalakiyê.

Pêkhateyên Kurd, Ereb û Ermen ên navçeyên Sirînê û Girê Spî tev li çalakiya greva birçîbûnê bûne.

Çalakiya greva birçîbûnê bi armanca şermezarkirina tecrîdkirina Rêberê Gelê Kurd Abdullah Ocalan û piştgirya çalakiya parlamentera HDP`ê ya bajarê Culemergê û hevseroka KCD`ê ya bakurê Kurdistanê Leyla Guven di girtîgeha dewleta Tirk de 10`ê Kanûnê dest pê kir.

Di bin konê çalakiyê de ji rêveberên Meclisa TEV-DEM`ê û bi navê şandeya Sirînê Mûrad Lalo û bi navê Koordînasyona Kongreya Star Zehra Birkul axivîn. Di axaftinan hate teqezkirin ku dê têkoşîn û berxwedana xwe heta azadiya Rêberê Gelê Kurd Abdullah Ocalan dewam bikin.

Tê payîn ku dê di saetên êvarê de semînerek li ser têkoşîna Rêberê Gelê Kurd Abdullah Ocalan were dayîn.

(bx)

ANHA