Cenazeyê Wail Kobanê li Reqayê hat veşartin

REQA

Bi sedan şêniyên Reqa û gundewarê wê ji bo wergirtina cenazeyê şehîd li ber çerxerêya El-Firûsiyê kom bûn. Piştî wergirtina cenaze bi kerwanekî wesayîtan ku bi wêneyên şehîd hatibûn xemilandin ber bi goristana şehîdan a gundê El-Hikumiyê ve ketin rê.

Tevî şêniyan nûnerên Meclisa Saziya Şehîdan, Meclisa Sivîl a Reqayê, şervanên QSD'ê, endamên Mala Jin û meclisên gel ên Reqa û gundewarê wê tev li merasîmê bûn.

Li goristanê bi dehan şêniyên gundê El-Hikumiyê, Hezîme û gundên derdorê tev li merasîmê bûn. Her wiha şêniyan li gel berzkirina dirûşmeyên 'Şehîd namirin' cenazeya şehîd hilgirtin ser milên xwe û danîn ser dika goristanê da ku merasîm destpê bike.

Merasîm bi deqeya rêzgirtin û torenek leşkerî ji hêla şervanên QSD'ê destpê kir.

Piştre bi navê QSD'ê fermendar Merwan Reqa axivî û sersaxî ji malbata şehîd re xwest û wiha got: "Ta bidestxistina serkeftinê em şopdarên rêya şehîdan in. Ji bo jiyanek azad û bi rûmet û aram û ji bo qewirandina terorê divê em asta têkoşînê bilind bikin."

Paşê bi navê Mala Jin Xaliye El-Kecwan axivî û destnîşan kir ku bi saya xwîna şehîdan jin azad bû û rola xwe ya pêşeng di hemû saziyan de lîst. Her wiha anî ziman ku ew deyndarên xwîna şehîdan in û wiha got: "Em bejna xwe li hember dayîkên wan lehengên ku di rûpelên dîrokê de destenên lehengiyê xêz kirine ditewînin."   

Piştî bi dawîbûna axaftinan wesîqeya şehadetê hate xwendin û radestî malbata şehîd hate kirin. Her wiha Saziya Malbatên Şehîdan nasnameya şehîd Ismaîl Ibrahîm bi nasnav Sêf ê ku di Şerê Tinekirina Terorê de şehîd bûbû eşkere kir.

Di dawiya merasîmê de rêhevalên şehîd Wail Kobanê cenazeyê hevalê xwe di nav tilîliyên dayîkan de û berzkirina dirûşmeyên dilsoziya bi şehîdan re spartin axê.

(şx)

ANHA