Cenazeyê Ebdulhemîd El-Letfo li Minbicê hat veşartin

MINBIC

Bi sedan welatiyên bajarê Minbicê cenazeyê şervanê Meclisa Leşkerî ya Minbicê Ebdulhemîd El-Letfo (Mûrad Zaza) ku 24‘ê mehê di encama teqînekê de li Minbicê şehîd bibû bi merasîmeke spartin axê.

Kerwanê oxirkinê ji pêşiya nexweşxaneya Firat ber bi Goristanê Şehîdan ve bi rê ket.

Li goristanê merasîmek leşkerî ji aliyê Hêzên Erka Xweparastinê ve dest pê kir, paşê Rêveberê Saziya Malbatên Şehîdan Mehmûd El-Îdo axivî û sersaxî ji malbata şehîd re xwest û hemû cangoriyên azadiyê bi bîr anîn.

El-Îdo got:"Xwîna şehîdan a zelal nexşeya jiyana azad û demokratîk xêz dike, em bi şehîdên xwe serbilind in ji ber ku xak û rûmeta me parastin, ew in parêzvanên rasteqîn ên vî welatî ne."

Ji fermandarên Meclisa Leşkerî ya Minbicê Îbrahîm El-Benawî jî axivî û wiha anî ziman: "Teror ne ol û ne jî mezhebê jê re heye, ne sivîl û ne jî leşker nas dike, me îro şehîdek da û em ê bidin heya bighêjin azadî û edaletê."

Îbrahîm El-Benawî soza şopandina xeta şehîdan û pêkanîna armancên wan da.

Fermandarê Foca Şehîd Mihemed Zaza di merasîm de axivî soza da ku ew ê li hemberî êrîşên çeteyan bibin mertal û hemû pilanên wan têk bibin.

Bi navê Rêveberiya Sivîl a Demokratîk a Minbic û Gundewarên wê Hevserokê Meclisa Rêveber Mihemed Şêxo got: "Sekna me ya li vî cihê pîroz sekna azadiyê ye, azadî ev e berdêlên wê giran e, bi xwîna şehîdan me gihiştin azadiyê."

Endamê Meclisa Malbatên Şehîdan  wesîqeta şehadetê ya Ebdulhemîd El-Letfo xwend û radestî malbata şehîd kir.

Cenazeyê şehîd di nava diruşme û tilîliyên dayikan hat veşartin.

ANHA