Têkildar tundiya li ser jinan semîner hate dayîn

HESEKÊ

Semîner li navçeya Zirganê li hola Meclisa Gel a Zirganê hate lidarxistin. Semîner bi deqeyeke rêzgirtinê dest pê kir. Di semînerê de endamên saziyên sivîl û bi dehan jin beşdar bûn.

Di semînerê de behsa Roja Cîhanî ya Têkoşîna li dijî Tundiya li ser Jinan û çîroka her sê xwişkên Mîrabal hate kirin.

Di semînerê de Rêveberiya  Kongreya Star a Serêkaniyê Mûna Yûsif axivî û behsa dîroka mirovahiyê kir da ku rêbazên avakirina civakan werin nasîn û rola jinan ji hezaran salan ve di avakirina civaka xwezayî de û wiha anî ziman: "Sîstemên sermayedar ên desthilatdar jin û mêran wek kole dibînin, lê belê jin ji aliyê van sîsteman û mêran ve kole hatin dîtin."

Mûna Yûsif behsa têgeha azadiyê kir ku şaş tê bikaranîn, bi taybet ku li dewletên rojavayî tê meşandin û rê ji ciwanên jin re vedike ku ji pîvanên civaka xwe derkevin û ji azadiya rasteqîn dûr dikevin. Mûna her wiha behsa rewşa jinan û serpêhatiya wan di serdema dagirkeriya DAIŞ'ê de kir û di dawiya semînerê de wiha got: "Jinan tevî hemû tundiya li ser wan tê meşandin, xwe di hemû aliyan de îspat kir. Berxwedana leheng a şervanên YPJ'ê li dijî çeteyên DAIŞ'ê mînaka vê yekê ye."

Semînera bi nîqaşê bi dawî bû.

ANHA