Di encama dorpêçê de tevgera bazara Burca Qas lawaz bûye

Bazara gundê Burca Qas beriya dagirkirina Efrînê cihê gelek firoşkar û şêniyan bû. Niha ji ber dorpêçê tenê du firoşkar mane ku pêwîstiya bazarê bi cih tînin.

3 mijdar, 2018 09:44

ARIF SILÊMAN - TOLÎN HESEN / EFRÎN

Beriya ku artêşa Tirk a dagirker û çeteyên girêdayî wê kantona Efrînê dagir bikin, 25 firoşkar her duşem li gundê Burca Qas a navçeya Şêrawa bazar vedikir û hemû pêwîstiyên jiyanî difirotin.

Bazara gundê Burca Qasê bûbû meqseda şêniyan ku pêwîstiyên xwe yên jiyanî, xwarin, vexwarin, cil û pêwîstiyên mitbexê jê dikirîn.

Piştî dagirkirina kantona Efrînê ji aliyê leşker û çeteyên artêşa Tirk a dagirker ve li 6 gundên navçeya Şêrawayê di nav de Burca Qas dorpêç hate ferzkirin. Vê yekê bandoreke neyînî li ser tevgera bazarê kir. Lewre niha tenê 2 firoşkar ku ji herêma Nubul û Zehra ne, firoşkariyê dikin û hin pêwîstiyên şêniyan bi cih tînin.

Welatiya bi navê Eyşe Cemîl a ji gundê Burca Qas ji ajansa me re diyar kir ku beriya dagirkirina Efrînê bi dehan firoşkar li bazarê hebûn û pêwîstiyên gundiyan bi cih dianîn. Piştî dagirkirinê dorpêç li ser gund hate ferzkirin, tenê 2 firoşkar roja duşemê têne bazarê, lê gelek tişt lê peyda nabin.

ANHA