'Wekî îro gelên cîhanê bi tîpên zêrîn dîroka hevgirtina xwe nivîsand'

KOBANÊ

Hevseroka Meclisa Sûriye Demokratîk (MSD) Emîne Umer beşdarî şahiya salvegera Roja Kobanê bû ku li bajarê Kobanê tê lidarxistin. Emîne Umer di şahiyê de axivî û wiha got: "Wekî îro yekitiya îradeya gelên azad ên cîhanê pêk hat û piştgiriya xwe ji bo pêkanîna edaletê bi berxwedana Kobanê re ragihandin. Di her kolaneke vî bajarî de berxwedaneke efsaneyî ji aliyê şervanên YPG'ê û YPJ'ê yên wekî têkoşer Arîn Mîrkan pêk hatiye. Kobanê bi ser ket û dijminên mirovahiyê têk şikestin."

Emîne Umer di axaftina xwe de bal kişand ser alîkariya Tirkiyeyê bi çeteyên DAIŞ'ê re dema ku êrîşî Koban dikirin û got ku niha di salvegera Roja Kobanê ya Cîhanê de artêşa Tirk êrîşî herêmên ewle dike û sivîlan armanc dike."

Emîne Umer got ku tu hinceta êrîşa Tirkiyeyê tune ye û piştrast kir ku aliyê tekane sûd ji berdewama aloziya Sûriyeyê werdigire Tirkiye ye û wiha domand: "Tirkiye sûd ji aloziya Sûriyeyê werdigire û ji bo ku berjewendiyên xwe pêk bîne herêmên Sûriyeyê dagir dike û alîkariya komên çete dike û armanca wê ya sereke mayîna çeteyên DAIŞ'ê ye."

Emîne Umer destnîşan kir ku Tirkiye dixwaze şerekî derxe da ku zexta li ser DAIŞ'ê kêm bike û bang li civaka navneteweyî kir ku helwesta xwe zelal nîşan bidin û wiha anî ziman: "Eger civaka navneteweyî bi erk û berpirsyariya xwe ranebe, ew dikarin herêmên ku bi xwîna şehîdan rizgar kirine, biparêzin."

El-Muhbaş: Li ber dîwarên keleha Kobanê dirindeya DAIŞ'ê hate têkşikandin

Di şahiyê de her wiha hevserokê Meclisa Rêveber a Rêveberiya Xweseriya Demokratîk Ebid Hamid El-Muhbaş axivî û bixêrhatina beşdaran kir û wiha got: "Dema ku komên çete yên DAIŞ'ê xwestin Kobanê dagir bikin welatî û şervanên Kobanê berxwedaneke bêhempa ji bo parastina bajarê xwe da meşandin û gelek şehîd dan."

El-Muhbaş wiha domand: "Li vir DAIŞ hate şikandin. Li ber dîwarê keleha berxwedana Kobanê dirindeya DAIŞ'ê ji aliyê şervanên berxwedêr ve hate têkşikandin û dîroka lehengiyê bi tîpên zêrîn nivîsandin. Dirindeya DAIŞ'ê ku dihat gotin ku tu carî nayê şikandin li vê herêmê tunekirina DAIŞ'ê dest pê kir û niha li Dêrazorê tê bidawîkirin."

El-Muhbaş got bila Erdogan û komên terorîst ku alîkariya xwe ji wî werdigirin baş bizanibin ku pêkhateyên herêmê dê li hemberî hovîtiya wan li ber xwe bidin û wiha domand: "Rêjîma Tirkiyeyê dixwaze zexta li ser DAIŞ'ê kêm bike û baldariya QSD'ê bi van êrîşên xwe li dijî Bakurê Sûriyeyê tevlihev bike."

Şahî bi axaftinên rayedaran û pêşkêşkirina dîmenên hunerî berdewam dike.

ANHA