Xelat li xwendekarên Reqayê hatin belavkirin

REQA

Çeteyên DAIŞ`ê dema ku bajarê Reqayê dagir kir, hemû dibistan, peymangeh û zanîngeh girtin. Tevliheviyeke pir mezin li wê derê çêkirin û xwendekar ji xwendinê mehrûm kirin.

Piştî ku bajarê Reqayê hate rizgarkirin, Komîteya Perwerde û Fêrkirinê ji nû ve dest bi sererastkirina dibistanên Reqa û gundewarên wê kir. Li Reqayê 232 dibistan ji nû ve hatin aktîfkirin.

Bi destpêkirina sala xwendinê ya nû re xwendekarên Reqayê berê xwe didin dibistanan.

Komîteya Ciwan û Sporê û Komîteya Perwerde û Fêrkirinê yên girêdayî Meclisa Sivîl a Reqayê bi armanca ku xwendekar bi awayekî baştir tev li xwendinê bibin li Dibistana Îbrahîm Henano ya taxa El-Teyar şahiyek li dar xist.

Bi dehan ciwan, mamosteyên Îbrahîm Henano û bi dehan xwendekarên bajêr tev li şahiyê bûn. Şahiyê bi rêzgitin dest pê kir. Paşê yek ji rêveberên Komîteya Xwendekaran a Meclisa Sivîl a Reqa û Gundewarên Wê Ehmed El-Egle destnîşan kir ku ciwan roniya pêşerojê ne.

El-Egle tekez kir ku bi saya xwendekaran pêşerojeke xweş û geş dê were avakirin, ji ber wê divê xwe di hemû aliyên jiyanê de zana bikin.

Di dawiyê de xwendekar ji aliyê Komîteya Ciwan û Sporê û Komîteya Perwerde û Fêrkirinê ve hatin xelatkirin.

(bx)

ANHA