Li ser çemê Firatê masîvaneke jin

DÎCLE EHMED – ZANA SEYDÎ / KOBANÊ

Li ser çemê Firatê li bakurê Sûriyeyê, yek ji gundên biçûk ku bi rengê kesk hatiye xemilandin, gundê El-Deba ye û nêzî bajarokê Sirînê yê Kobanê ye. Şêniyên wan gundan ji êlên El-Emîrat in ku mezintirîn êlên Ereb li Bakurê Sûriyeyê ne.

Li gundê El-Deba wekî gelek gundên din ne alav, avahiyên mezin û ne jî rêyên ziftkirî hene, lê di aliyê xwazayî de yek ji cihên xweşik li Sûriyeyê ye û gelek darên sefsaf, serû û sinûbere û gelek darên zeytûn û hinaran lê hene.

Masîvanî ji pîşeyên sereke li wî gundî ye ku bi rêya wê debara xwe ya jiyanê dikin. Masiyên ku digirin, difiroşin bazirganan û bazirgan wan dibin bajar û bajarokan.

Emşê Mihemed ku bi temenê xwe 50 salî ye, zarokên wê derketin derveyî welat. 33 sal e li kêleka hevjînê xwe masiyan digire û hemû bendên ku li ser jinan hatibûn ferzkirin, şikandin.

Emşe Mihemed ku qermûçkên rûyê wê serpêhatiya salan vedibêjin, rojane keleka xwe ya biçûk li rex hevjînê xwe Ehmed El-Selûm ê 63 salî ber bi keviya çemê Firatê ve dibe û dest bi masîgirtinê dike.

Piştî ku 3 kurên wê derketin derveyî welat û keçên wê zewicîn û dûrî wê ketin, çongên Emşeyê diêşin lê tevî wê jî neçar e ku alîkariya hevjînê xwe bike ku debara jiyana xwe bikin.

Ji ber çem berê xwe didin malê, bi şev li ber roniya lembeyeke biçûk rûdinin. Mala wan a biçûk bi ax û keviran hatiye lêkirin.

Bi tenê motorsîklêteke wan heye û ew jî ji bo pêwîstiyên rojane kirîne. Her wiha keştiyeke biçûk heye ku bi rêya wê debara xwe dikin. Dixwazin jiyana wan baştir be û zarokên wan perwerdeyê bibînin û xizmetguzarî bikeve gundê wan.

Bi derketina rojê re Emşe û hevjînê wê berê xwe didin çem û dest bi rakirina şebekeyê dikin. Piştî seatekê ji rakirina şebekeyê, dayika Emşe û hevjînê wê hejmareke masiyan digirin, lê li gorî axaftina wan ku masî hindik in, ji ber ku hin masîgir rêyên nerast bi kar tînin, mayinan bi kar tînin û bi rêya elektrîkê masiyan digirin lê ev tişt jî dihêle hemû hêk biteqin.

Ev gund wekî gelek gundên din di salên 90‘î de ket bin avê û şêniyên gund koç kirin. Lê piştî ku bendava Tişrîn li ser çemê Firatê hate avakirin, hişt ku bi dehan gundên li derdorê winda bibin.

(jo)

ANHA