Li Efrînê hovîtiya dagirkeran didome

Li Efrînê sivîlek ji aliyê dagirkeran ve ji ber dikana xwe hate revandin û beramberî berdana wî pere ji malbata wî hate xwestin. Her wiha malbatên çeteyan berhemên zeytûnê yên şêniyên Efrînê didizin.

17 cotmeh, 2018 09:34

EFRÎN

Artêşa Tirk a dagirker û çeteyên wê hovîtî û bipêkirina mafên mirovan û xwezayê li Efrînê didomînin. Her wiha kiryarên qirkinê li ser gelê Efrînê pêk tînin.

Li gorî çavkaniyekî ji Efrînê ji ajansa me ANHA`yê re diyar kir ku çeteyên artêşa Tirk şêniyê bi navê Reşîd Ebdû Seîd ji ber dikana wî ya li gundê Bedîna yê navçeya Mabata revand.

Çavkanî teqez kir ku piştî 4 rojan ji revandina wî û îşkencekirina wî, çete bi malbata wî re axivîn û li beramberî berdana wî 20 hezar dolar xwestin. Çavkanî destnîşan kir ku rewşa madî ya sivîlê hatiye revandin ne baş e û pereyên ku ji wan hatine xwestin li gel wan tune ne.

Malbatên çeteyan berhemên zeytûnan didizin

Li Efrînê çete mal û milkên şêniyên Efrînê di nava hev de parve dikin û bi awayekî eşkere malên wan talan dikin.

Di vê çarçoveyê de çavkanî diyar kir ku malbatên çeteyan ên ji Xûta û Idlibê hatine, berhemên zeytûnên şêniyên navçeya Şiyê ya kantona Efrînê didizin. Her wiha çete berhemên zeytûnan ji gundê Çeqmaqa mezin û Meydan Ekbes ên navçeya Raco jî didizin.

Hêjayî bibîrxistinê ye ku artêşa Tirk a dagirker û çeteyên wê ji destpêka ku kantona Efrînê dagir kirine bi sedan sivîl revandine, her wiha çarenûsa bi sedan ne diyar e.

(bx)

ANHA