‘Tirkiye ditirse desthilata wê hilweşe, lewma hewl dide dengê rastiyê qut bike’

Rojnamevanên bajarê Kobanê diyar kir ku dewleta Tirk bi hinceta derbeya leşkerî rojnamevan û siyastemedarên ku li dijî hikumetê têkoşînê dikin, digire û dewleta Tirk ditirse ku desthilatdariya xwe hilweşe, ji ber vê yekê hewl dide dengê rastiyê qut dike.

11 cotmeh, 2018 07:46

HÊZA HESEN / KOBANÊ

Rojnamevanên Kurd ên Kobanê têkildarî girtina zêdetirî 100 siyasetmedar û rojnamevanên Kurd li gelek bajarên Tirkiye û bakurê Kurdistanê di 9'ê Cotmahê de ji aliyê hikumeta AKP`ê ve, ji ajansa me re axivin.

Rojnamevan Lezgîn Mihemed: Dewleta Tirk bi rêya girtina rojnamevanan hewl dide rastiya aloziya xwe ya hundirîn veşêre. Dewleta Tirk van siyasetan pêk tîne ji bo ku xwe ji hilweşînê biparêze û demê qezenc bike. Dewleta Tirk bi hinceta hewldana derbeya leşkerî ku di sala 2016'an de pêk hatibû, rewşa awarte ragihand. Piştî wê gelek siyasetmedar û rojnamevanên Kurd girtin. Tirkiye li dijî her kesekî ku bi demokrasiyê û azadiyê bang dike, siyaseteke dîktatorî dimeşîne.

Rojnamevan Cemal Balî: Hikumeta AKP'ê bi rêya girtina rojnamevanan û qedexekirina derbasbûna wan ji herêmên Bakurê Sûriyeyê re da ku rastiyên şoreşa Bakurê Sûriyeyê aşkera nekin, nagihîje armanca xwe. Divê Erdogan zanibe ku ew bi ser nakeve û nikare dengê heqîqetê qut bike û veşêre. Tirkiye rojnamevanên ku rastiya aloziya Tirkiyeyê û binpêkirinên wê yên şovenîst der heqê gel de derdixin holê, digire.

(şx)

ANHA