Li Reqayê amadekariyên zivistanê

Bi armanca peydakirina debara herêmê, cotkarên herêma El-Kesrat a gundewarên başûrê Reqayê amadekariyên çandina mewsima zivistanê wekî xiyar, bacanên sor, bexdenus û hwd. dikin.

CIVAK Û JIYAN

11 cotmeh, 2018 07:51

EMAR EL-XELEF - HEMED EL-MISTEFA / REQA

Herêma El-Kesrat ji girîngtirîn herêmên çandiniyê li bajarê Reqayê ye û çavkaniya debara jiyanê ya gelê Reqayê ye. Ji ber ku piraniya şêniyên herêmê debara xwe bi çandiniyê dikin. Her wiha herêma El-Kesrat bi çandina hemû cureyên sebzeyan navdar e.

Yek ji taybetmendiyên axa herêma El-Kesrat sor e û madeya azotê tê de heye, ev made jî dihêle ku sebze, fêkî, genim û hwd. bi awayekî baş derkeve. Qadên çandiniyê li herêma El-Kesrat zêdetirî 15 hezar donim e û piraniya wan zeviyan bi rêya çemê Firatê tê avdan.

Herêma El-Kesrat ji tevahiya bajarê Reqayê re pêdiviya sebzeyên zivistanê yên wekî bexdenûs, reşad, spenaq, nane, tivir û petat (kartol) û gelek cureyên din peyda dike. Miqdara hilberînê ya zêde bi rêya bazirganan dişînin herêmên Bakurê Sûriyeyê.

Têkildarî mijarê cotkarê ji şêniyên gundê Kesrat Ferec bi navê Xelîl Selûm wiha got: "Îro em zeviyên xwe ji bo mewsima zivistanê ji nû ve diajon û amade dikin. Hindek cureyên sebze wekî xiyar û bacanên sor ku serma û seqemê tehemul nakin, ji ber wê em di serayan de diçînin."

(şx)

ANHA