Welatiyên Dêrazorê şehîdên Şerê Tunekirina Terorê oxir kirin

DÊRAZOR

Welatiyên deverên Hecîn û Ebû El-Xeşeb û gundên girêdayî Dêrazorê beşdarî merasîma oxirkirina şehîdên QSD'ê yên bi navên Yûsif El-Hemadê (Şamil), Yûsif El-Mixelef (El-Dîb), Ebid El-Salih (Seyad), Mistefa El-Dirih, Tirkî El-Ehmed (Welat Hecîn) û Ebdilkerîm Mihemed bûn.

Merasîma cenaze bi deqeyeke rêzgirtinê û toreneke leşkerî ji aliyê şervanên QSD'ê ve dest pê kir. Paşê fermandarê QSD'ê Dilşêr axivî û wiha got: "Em rojane gulekê di baxçeyê şehîdan de diçînin bi saya fedakariya van şehîdan herêm tê rizgarkirin û berxwedana li dijî dagirker û hovan didome."

Di merasîmê de endama Meclisa Zagonsaz a Dêrazorê Îman El-Ehmed axivî û wiha got: "Şehîd namirin. Em soz didin ku rêya van şehîdan bişopînin û welatekî azad ji nifşên nû re ava bikin."

Li ser navê Saziya Malbatên Şehîdan Wîsal Hezah, li ser navê Mala Jinan a Dêrazorê Hesna El-Hemed, rêveberê meclisa gundê El-Kebir Mihemed Necim û rêveberê meclisa bajarokê Ebû Xeşeb Mihemed El-Fenan di merasîmê de axivîn. Axaftvanan behsa fedakariya şehîdan kir û da zanîn ku bi saya fedakariya wan, pêkhateyên herêmê azad bûne û soza şopandina rêya şehîdan dubare kirin.

Piştre belgeyên şehadeta şehîdan hatin xwendin û radestî malbatên wan hatin kirin. Di dawiya merasîmê de welatiyan bi dirûşmên dilsoziya bi şehîdan re û tilîliyên dayikan cenazeyên şehîdan li Goristana Şehîd Xidir El-Hemadê ya li bajarokê Ebû El-Xeşeb, spartin axê.

ANHA