Şêniyên Girê Spî cenazeyê şervanê QSD‘ê Ehmed Salih veşartin

GIRÊ SPÎ

Bi sedan welatiyên Kantona Girê Spî cenazeyê şervan QSD‘ê Ehmed Salih ku dema bi erka xwe radibûn şehîd bibû, bi merasîmekê li Goristana Şehîd Mehmûd Tiûmê veşartin.

Girseya gel piştî ku cenaze ji nexweşxaneya leşkerî wergirtin bi kerwanekî ji dehan wesayîtan ber bi Goristana Şehîd Mehmûd Tiûmê ve herikîn.

Li goristanê ji bo bîranîna şehîdan deqeyek rêz hate girtin û ji aliyê şervanên QSD‘ê ve merasîmeke leşkerî hate lidarxistin. Piştre Rêvebera Saziya Malbatên Şehîdan Zozan Berces, Rêveberê Meclisa Kantona Girê Spî Sebirî Nebo, Fermandarê QSD‘ê Ebû Salih El-Hindawî û Rêvebera  Kongreya Star Dîlan Hesen axivîn.

Kesên axivîn, sersaxî ji malbata şehîd re xwestin û gotin, şehîdên bi berdêlên giran şoreş gihandine vê astê.

Her wiha banga hevgirtinê li hemberî siyasetên faşîzmeyê hate kirin û hate gotin ku gelê bi doza û şehîdên xwe ve girêdayî ye û li Dêrazor be anî jî Efrînê, li her deverê dê têkoşîna xwe dewam bike.

Piştre wesîqeyên şehadetê  ji aliyên Meclisa Malbatên Şehîdan hatin xwendin û radestî malbata wî hate kirin.

Cenazeyê şervanê QSD’ê li goristanê bi dirûşmeya ‘Şehîd Namirin’ û tilîliyên dayikan hate veşartin.

ANHA