Komîteya Çandiniyê ya Dêrazorê karîgeriyeke nû vekir

Komîteya Çandiniyê ya girêdayî Meclîsa Sivîl a Dêrazorê karîgeriyeke xwe li gundewarê rojhilatê devera El-Bisêra bi merasîmekê vekir da ku çavdêriya karûbarên çandiniyê yên herêmê bike.

9 îlon, 2018 11:51

DÊRAZOR

Bi armanca piştgirî û alîkariya beşa çandiniyê û pêşxisitina asta hilberînê û alîkariya cotkarên gundewarên rojhilatê Dêrazorê, Komîteya Çandiniyê ya girêdayî Meclîsa Sivîl a Dêrazorê îro li devera El-Bisêra karîgeriyeke xwe bi merasîmekê vekir.

Di merasîmê de hevserokên Komîteya Çandiniyê Şêrîn Siûd û Mihemed Xêr û endamên meclîs û bi dehan welatiyên El-Bisêra û gundên derdorê û rêveberên hêzên Ewlehiya Hundirîn amade bûn.

Merasîm bi deqeyeke rêzgirtinê dest pê kir. Paşê hevserokê Komîteya Çandiniyê Mihemed Xêr vekirina karîgeriyê li hemû cotkar û welatiyên herêmê pîroz kir û got ku pêşxistina çandiniyê li herêmê hestîpişta pêşxistina aboriya herêmê ye û wiha anî ziman: "Em ê bi hemû hêz û derfetên xwe alîkariyê ji cotkaran re bikin da ku di salên pêş de hilberîneke baştir wergirin.”

Piştre deriyê karîgeriyê ji aliyê hevserokên Komîteya Çandiniyê Şêrîn Siûd û Mihemed Xêr ve hate vekirin û şêranî li beşdaran hate belavkirin.

Meclîsa Sivîl a Dêrazorê ji dema hatiye damezirandin ve bi hemû derfetên xwe hewl dide alîkariyê bi welatî û cotkarên herêmê re bike.

ANHA