Siyasetmedarên Şêxmeqsûdê: Rêxistinên hiqûqî berpirsên rewşa Ocalan in

ROZANA DAWÛD / HELEB

Bertekên nerazîbûnê û şermezarkirinê li hemberî tecrîda giran ku dewleta Tirk li ser Rêberê Gelê Kurd Abdullah Ocalan ferz kiriye zêde dibin. Dewleta Tirk ji beriya 2 salan ve tecrîdeke giran li ser Ocalan ferz dike û hevdîtinên wî bi malbat û parêzeran re red dike.

Di hevpeyvînek bi ajansa Hawarê re, hevserokê Partiya Yekitiya Demokratîk ê Helebê Îsa Mistefa got ev girtekên dewleta Tirk ên keyfî der heqê Ocalan de, morala gel naşikînin lê belê gel hêza xwe ji berxwedana Ocalan digire û berxwedanê didomîne û wiha axivî: "Em ê li hemberî kirinên dewleta Tirk ên hovane der heqê Ocalan de teslîm nebin. Tirkiye dixwaze gelê Kurd qir bike, lê keç û xortên Rojava-Bakurê Sûriyeyê li ser rêya Ocalan meşiyan û gelek serkeftin bi dest xistin û bi vî awayî planên dewleta Tirk têk birin."

Ji aliyê xwe ve endama Komîteya Têkiliyên Dîplomasî ya Kongreya Star a Helebê Leyla Xalid diyar kir ku dewleta Tirk bi salan e der heqê gelê Kurd û gelên herêmê de hovanetirîn sûcan dike. Dewleta Tirk bi komployan dixwaze gelê Kurd û gelên banga azadî û demokrasiyê dikin qir bike. Ji vê bingehê ve tecrîdeke giran li ser Ocalan ferz dike û nahêle gelên din bigihîjin azadiya xwe.

Her wiha Leyla tekez kir ku bi saya fikr û felsefeya Ocalan jin xwe birêxistin kir û gihaşt astên pêşketî ji azadiya xwe. Her wiha rola xwe ya pêşeng di rêvebirina civakê de lîst. Ji ber wê pergalên dîktatoriyê wekî Tirkiye naxwazin gel bi giştî û bi taybet jin bighîjin azadî û mafên xwe. Ji ber wê bi komployekê Ocalan girtin û tecrîdeke giran dûrî pîvan û qanûnên navdewletî li ser wî ferz dike.

Di dawiyê de Leyla Xalid destnîşan kir ku gelê Kurd dest ji rêberê xwe bernade û heta rizgarkirina Ocalan dê tê bikoşe. Her wiha Leyla diyar kir ku rêxistinên hiqûqî û mirovî berpirsên binpêkirinên ku li Imraliyê der heqê Ocalan de pêk tîne.

(şx)

ANHA