Gelê Dêrazorê du lehengên xwe oxir kirin

Şervanên QSD‘ê Ela El-Îbrahîm (Şevger Teyana) û şervanên Hêzên Erka Xweparastinê Ednan El-Yezîdî bi merasîmeke girseyî li şehîdgeha Hanî El-Hesen a herêma El-Bisêra hatin oxirkirin.

NÛÇE

19 tebax, 2018 15:06

DÊRAZOR

Bi sedan şêniyên herêma Dêrazorê ku alên QSD‘ê û wêneyên şehîdan hilda bûn, beşdarî merasîma veşartina cenazeyên şervanên QSD‘ê Ela El-Îbrahîm (Şevger Teyana) û şervanên Hêzên Erka Xweparastinê Ednan El-Yezîdî bûn.

Piştî ku şêniyan cenaze wergirtin, bi kerwanekî ji dehan seyareyan ku hatibûn xemilandin ber bi şehîdgeha Hanî El-Hesen ve bi rê ketin.

Kerwanê cenaze li şehîdgehê ji aliyê dehan kesî ve di nava dirûşmeyan û bilindkirina sembolên serkeftinê de hat pêşwazîkirin.

Şervanên Hêzên Erka Xweparastinê merasîmek leşkerî li dar xistin. Ji fermandarên Hêzên Erka Xweparastinê Demhat Hesekê sersaxî ji malbata şehîdan re xwest û diyar kir ku ew ê xeta şehîdan bişopînin û destkeftiyên wan biparêzin.

Hevseroka Meclisa Herêma Siwer Îlham El-Hisên jî got, "Em li ser xwîna şehîdan bazarê nakin, berdêl çi be bila ew be em dev ji warê xwe bernadin û li hemberî her êrîşan bê bersiv nemînin."

Wesîqeyên şehîdan hatin xwendin û radestî malbatên wan hatin kirin.

Herî dawî cenazeyên herdu şehîdan di nava dirûşme û tilîliyan de hatin veşartin.

(bb)

ANHA