Li Hesekê çalakiyên pêşxistina karînên zarokan

NESRÎN ELÎ / HESEKÊ

Saziya Perwerdeyê di 16'ê Hezîrana borî ve û piştî bidawîbûna sala perwerdeyê, dewreyên ji bo pêşxistina karînên zarokan li her du dibistanên Hesekê, Can Hecar li taxa El-Salihiyê û Elî Bekir li taxa El-Kelasê vekirin. Saziyê, bajar bi navê beşa rojhilat û beşa rojava dabeşî du beşan kiribû.

Zarok di dewreyan de li gorî derfet û daxwazên xwe tev li gelek çalakiyên muzîkê wekî stran û lêdana amûrên tembûr, ûd, kemen û gîtarê û çalakiyên hunerî wekî karên destan û çalakiyên werzîşê bûn.

Zarokên ku tev li dewreyan bûne, temenên wan di navbera 6-16 saliyê de bûn. Hejmara zarokên ku tev li dewreyan bûne 325 e. Li dibistana Elî Bekir a taxa El-Kelesê 150 zarok û li dibistana Can Hecar a taxa El-Salhiyê 175 zarok. Zarok ji taxên El-Eziziye, El-Miftî û El-Salihiyê tev li dewreyan bûn.

Di hevpeyvînek bi ajansa me re endamên rêveber a çalakiyên havînê li her du dibistanan Biyan Bekir (D.Elî Bekir) û Bîwan Mihemed (Can Hecar) li ser armancên vekirina van dewreyan axivîn û destnîşan kir ku ji bo pêşxistina şarezahî û karînên zarokan û ji bo dûrxistina wan ji rewşa şer wan ew dewre vekirine.

Her du endamên rêveber diyar kir ku li ser daxwaza malbatên zarokan û ji bo bilindkirina asta zarokan di zimanê kurdî de wan dewreyên fêrkirina zimanê kurdî jî vekirine. Her wiha zarokan jî kêfxweşiyên xwe ji bo tevlêbûna van çalakiyan anî ziman û spasiya mamosteyan kir.

(şx)

ANHA