Pirsgirêka kanalîzasyonê ya taxa Hilêliyê çareser bû

EHMED SEMÎR / QAMIŞLO

Ev çend sal in welatiyên taxa Hilêliyê ya bajarê Qamişlo ji ber pirsgirêkên kanalîzasyonê rastî gelek astengiyan tên. Di demsalên Zivistanê de ava kanalîzasyonê derbasî xaniyên welatiyan dibe û di demsalên Havînê de jî bihna qirêj zêde dibe û di encamê de gelek nexweşî derdikevin. Devera herî zêde ziyanê ji vê pirsgirêkê dibînin, komîna Şehîd Mizgîn e.

Welatiyên taxê û bi riya komîna Şehîd Mizgîn gelek daxwazname pêşkêşî Şaredariya Gel a rojavayê bajêr kirin da ku pirsgirêka wan çareser bike. Piştî çend mehan ji bang û giliyên welatiyan, şaredariyê dest bi xebatên xwe yên çareserkirina pirsgirêkê kir. Şaredariyê kanalên nû li kanalîzasyonê zêde kirin û hemû devikên wan girtin.

Welatiyê bi navê Xandî Îbrahîm diyar kir ku ji ber pirsgirêkên kanalîzasyonê rastî gelek astengiyan dihatin û got ku di Havînê de bihna genî zêde dibe û di Zivistanê de jî ava kanalîzasyonê derbasî xaniyên wan dibû. Îbrahîm got ku Şaredariya Gel aliyekî pirsgirêkê çareser kir û aliyekî din jî hêjî li benda çareseriyê ye, ango di encama xebatên Şaredariyê de kolan têk çûne û pêdivî bi sererastkirina van kolanan heye.

Welatiyê bi navê Welîd Mehmo got ku pirsgirêka kanalîzasyonê ev nêzî 20 sal in nehatiye didome û got ku di serdema rêjîma Baasê de herêmên Kurdan bi temamî hatibûn paşguhkirin.

Berpirsyarê projeya sererastkirina kanalîzasyona taxa Hilêliyê Hisnî Hisên got ku wan pirsgirêka sereke ya kanalîzasyonê çareserkirine û piştî xebatên sererastkirina kanalîzasyonê bi temamî çareser bikin, dê di van çend rojan de kolanên hatine xirabkirin jî bêne sererastkirin.

ANHA