Jinên êzidî yên Efrînê: Ji bilî berxwedanê tu çare nîn e

FÎDAN ABDULLAH / ŞEHBA

Jinên êzidî yên Efrînê têkildarî salvegera 4‘emîn a qirkirina êzidiyan ji ajansa me re axivîn.

Leyla Şamo komkujiya li dijî gelê kurd ê êzidî bi bîr anî û wiha axivî: “Gelê Şengalê beriya 4 salan wekî îro rastî êrîşeke hovane ji aliyê çeteyên DAIŞ‘ê ve hat. Êrîşa bi vî awayî careke din tekez dike ku komployeke bi destê gelek aliyan hate kirin û lawazbûn û tirsa xwe ji gelê ku bi nasname û baweriya xwe girêdayî wekî êzidî nîşan dikin. Hedefgirtina jinan, kuştin, revandin, îşkencekirin û kiryarên neexlaqî careke din jî lawazbûna wan li hemberî îradeya jinan îspat dike. Lîstokek e ku armanc wê îmhakirina civaka êzidî ye.”

Xatûn Ebdo bal kişand ser hevkariya çeteyên DAIŞ’ê û dewleta tirk û kiryarên wan ên li dijî jinan û wiha pê de çû: “Dagirkeriya Tirkiyeyê û çeteyên wê li Efrînê berdewam in. Ev yek tekez dike ku Tirkiye bi awayekî veşartî destekê dide komên çete da ku gelê kurd bi giştî û êzidî bi taybet îmha bikin. Lewre divê civaka navdewletî, raya giştî hesabê komkujiya Şengalê bixwaze û dagirkeriya Tirkiyeyê ji Efrînê derxin beriya ku komkujiyeke din jî li gelê êzidî pêk were.

Qiret Betal îşaret pê kir ku êrîşên artêşa tirk a dagirker û çeteyên wê yên li ser Efrînê berdewama komkujiya jinên Şengalê ye û wiha got: “Êdî jinên efrînî asta hovîtiya dagirkeriya Tirkiyeyê û çeteyên wê nas kir, ji ber vê yekê ji Efrînê derketin da ku nekevin destê wan. Em ê têkoşîna xwe berdewam bikin heta Efrînê ji dagirkeran rizgar bikin û em rê nadin ku dagirkeriya Tirkiyeyê û çeteyên wê armancên xwe yên qirkirina gelê kurd bi giştî û êzidî bi taybet, pêk bînin.

(bb/ew)

ANHA