Hunera ji tirsê hatibû temirandin, ji nû ve zindî dibe

REQA

Bi dirûşma "Bijî Reqa" Komîteya Çand û Hunerê ya girêdayî Meclisa Sivîl a Reqayê pêşengeheke tabloyên wênesaziyên ku şêwekarên Reqayê beriya 2011‘an xêzkiribûn, vekir.

Di dema ku çeteyên DAIŞ‘ê bajarê Reqayê dagir kiribûn, huner û şarestaniya herêmê temirandibû, di dema rêjîmê de rola hunermend û rewşenbîran jî hatibû paşguhkirin.

Bi rizgarkirina bajarê Reqayê ji aliyê QSD‘ê ve ji çeteyên DAIŞ‘ê hunermend û şêwekdarên Reqayê berhemên ku xwe yên ku bi salan hatibûn temirandinê êdî bi azadî û bi destekdayîna Meclisa Sivîl a Reqayê berhemên xwe derdixînin.

Di pêşengehekê de ku ji aliyê Komîteya Çand û Hunerê ya Meclisa Sivîl a Reqayê ve li hola avahiya Rêveberiya Sivîl a Demokratîk  Reqayê hatibû organîzekirin 25 tablo ku tê de qala adat û çanda gelê Reqayê dike, hatin pêşkêşkirin.

Hêjaye bi bîrxistinê, piraniya şêwekar û rewşenbîrên Reqayê di dema dagairkeriya çeteyên DAIŞ û komên navê "Artêşa Azad " li xwe dikin de penaber bibûn.

Şêwekarê Ehmed El-Cilid ku beşdarî pêşengehê bûye îşaret bi tabloyeke xwe kir û dibêje, "Ev tablo min ji sala 2011‘an de xêz kiriye, ji tirsa çeteyên DAIŞ‘ê ku şerê çand û hunera bajarê Reqayê kiribû min veşartibû."

Şêwekar bang li hemû hunermendan kir ku vegerîn warê xwe û beşdarî ji nû ve avakirina Reqayê bibin.

ANHA