Zeviyên pembo yên li Tebqayê li ber telefbûnê ne

Cotkarên pembo yên herêma Tebqayê, di xirabtirîn demsaleke pembo de ne. Kurmika El-Loz nêzî ji sedî 70 berhema pembo telef kiriye û her wiha derman kêm in û yên heyî jî sûdewar nîn in.

2 tebax, 2018 07:20

UDEY EHMED-NÛRÎ OMER/TEBQA

Pembo li herêma Tebqayê li ser beravên çemê Firatê tê çandin. Bi sedan hektarên ku bi pembo hatine çandin ji ber kurmika El-Loz telef dibin.

Midurê Komîteya Çandiniyê li bajarokê El-Mensûra li herêma Tebqayê Ebdulselam Ehmed wiha got: "Hilberîna pembo li bajarokê El-Mensûra ji ber gelek kurmikan wekî kurmika El-Loz bi hemû cureyên xwe (strî, gûzî û qirifulî) gelek ziyan dîtiye."

Kurmika El-Loz, kulîlka pembo dixwe û hêkên xwe tê de dike û piştî demekê ew hêk dibin kurmik û kulîlkên pembo dixwin, heta tovê pembo dimire. Bi vî awayî cotkar hilberînê ji ber telefbûnê berhev nakin.

Tunebûna dermanên kurmikan ên bikalîte li sûkên herêmê û tunebûna çavdêriyê li ser dermanên ku ji derve tên, dibin sedema belavbûna nexweşiyan di nav berhema pembo de û telefbûna hilberînê.

Ehmed tekez kir ku dermanên ji bo hilberîna pembo hatine bikaranîn tu zirar negihand kurmikê lê belê karê cotkaran zêde kir û diyar kir ku rêjeya zirardîtinê ji sedî 70 ye.

Midurê Komîteya Çandiniyê ya bajarokê El-Mensûra tekez kir ku eger ev rewş berdewam bike û kurmika El-Loz tune nebe, dê hemû hilberîn di çend hefteyan de telef bibe.

(şx/ew)

ANHA