Şêniyên Tebqayê 29 şehîdên xwe bi bîr anîn

Şêniyên Tebqayê û malbatên şehîdan îro 29 şervanan ku di nava refên QSD’ê de di pêngava rêzgarkirina Reqa û Tebqayê de şehîd bûn, bi merasîmeke ku ji aliyê Saziya Malbatên Şehîdan ve hate birêxistinkirin, bi bîr anîn.

NÛÇE

23 tîrmeh, 2018 12:12

TEBQA

Merasîma bîranînê li pêş Saziya Malbatên Şehîdan a bajarê Tebqayê bi amadebûna malbatên şehîdan û endamên saziyên leşkerî û sivîl û bi dehan şêniyên Tebqayê hate lidarxistin.

Cihê bîranîna şehîdan bi wêneyên 29 şehîdan û şehîdê neteweyî yê ji pêkhateya ereb Ezîz Ereb, ala QSD’ê û ala Saziya Malbatên Şehîdan hate xemilandin.

Merasîmê bi rêzgirtinê dest pê kir. Paşê, ji rêveberiya Saziya Malbatên Şehîdan Emîne Ebd El-Rezaq sersaxî ji malbatên şehîdan re xwest û wiha got: "Bi saya şehîdan em gihaştin azadiyê û îro jî ji ber berxwedana wan pêşerojek ji vî welatî re amad kirin. Em soz didin şehîdên xwe ku ew ê her tim di dilê me de zindî bin û em soz didin ku em ê riya wan bişopînin, her wiha dest bidin dest heta ku em hemû axa xwe ji dest dagirkeriyê rizgar bikin."

Hervseroka Meclisa Rêveber a Rêveberiya Sivîl a Demokratîk a Tebqayê Hind Elî jî axivî û ev tişt got: ʺSalvegera 19’ê Tîrmehê ku çirûska wê li Kobanê warê bexwedanê dest pê kir û heta Minbic, Tebqa, Reqa û Dêrezorê çû û şehîdan xwîna xwe rijand da ku îradeya gelan pêk bînin û rêveberiyeke xweser li bakurê Suriyeyê ava bikin."

Paşê, hevseroka Komîteya Parastinê ya Rêveberiya Sivîl a Demokatîk a Tebqayê Fatma Reşo axivî û wiha got: "Mirina birûmet ew mirina şehadetê ye, ji ber ku ji mirinê natirsin û ji xwe re kirin sembol. Em ê rêya şehîdan berdewam bikin.ʺ

Di dawiyê de, sînevîzyona şehîdên 19’ê Tîrmehê hate pêşkêşkirin û merasîma bîranînê bi dirûşma "Bijî berxwdana QSD ê" û tîlîliyên dayikan bi dawî bû.

(ekîb)

ANHA