Ciwanekî din ji Efrînê bi destê çeteyên dewleta tirk hate kuştin

Artêşa tirk a dagirker welatiyê bi navê Ebdo Mihemed Tobal ê ji navçeya Cindirêsê yê herêma Efrînê qetil kir.

22 tîrmeh, 2018 08:03

CEFER CEFO / EFRÎN

Artêşa tirk a dagirker û çeteyên wê kiryarên wekî qetilkirin, revandin û kuştina welatiyan berdewam dike. Balkêş e ku dagirkeriya tirk kesên ku bi wan re dibin alîkar jî direvînin û îşkenceyê li wan dikin.

Li gorî şahidên bûyerê çete mal û milkên gel yên dizînê, bi şevbêrkên serxweşbûnê û avêtina fîşengan heta sibê, li hev parve dikin.

Çavkaniyên herêmî ragihand ku di demên dawîn de, dagirkeriya tirk hemleyên revandin, îşkencekirin, dizîn, lêdan û kuştinê li ser kesên ku bi wan re dibin alîkar ji endamên ENKS`ê dimeşîne. Di vê çarçoveyê de, dagirkeriya tirk serokê qaşo meclisa herêmî ya navenda navçeya Cindirêsê revand û îşkence li wî kir, paşê ew vegerandin mala wî.

Ji aliyekî din ve jî, çeteyên ji koma Ceyş El-Şerqiyê ku artêşa tirk a dagirker wek berpirsên komên din ên çete li herêmê dibîne, ciwanê bi navê Ebdo Mihemed Tobal ê ji navçeya Cindirêsê kuşt.

(ekîb)

ANHA