Partiya Sûriyeya Pêşerojê bi şêniyên Tirbespiyê re civiya

QAMIŞLO

Civîn bi amadebûna bi dehan welatiyan hate lidarxistin û bi deqeyeke rêzgirtinê destpê kir.

Paşê jî Endamê Meclîsa Giştî ya Partiya Sûriyeya Pêşerojê Miwefeq El-Ehmede encamnameya Kongreya Damezrîner a Partiya, rêgez û armancên partiyê xwend.

El-Ehmed anî ziman ku armanca partiya veguhestina tecrûbeya demokratîk li hemû herêmên Sûriyê ye û got, "Sûriyê ya hemû gelên wê ye. Partiya Sûriyeya Pêşerojê dibîne ku divê çareseriya aloziyê siyasî û aştiyane be, her wiha hewl dide ku Sûriyê bibe dewleteke federal, ne navendî, demokratîk û pirreng ku mafên hemû gelên Sûriyê misoger bike."

Miwefeq, destnîşan kir ku porjeyên çareseriyê yên opozisyonê nîne, opozisyon bûye amûreke di destê hêzên deve ye, şerê di navbera wê û rêjîmê de tenê li ser desthilatdariyê ye.

Endama Meclîsa Giştî ya Partiya Sûriyeya Pêşerojê û Endama Buroya Rêxistinî ya partiyê Esmehan Îbrahîm nêrîna partiyê ya li ser jin destnîşan kir û got, "Armanca partiyê ew e ku mafê jin di destura Sûriyeya pêşerojê de were misogerkirin û hişmendiya zilamê serdest were tunekirin."

Endamê Buroya Ciwanan a Partiya Sûriyeya Pêşerojê ya herêma Cizîrê Ela El-Ubeyd jî anî ziman ku partiyê girîngiyê dide ciwanan û ji bo rêxistinkirin û piştgiriya wan kar dike.

Di dawiya civînê de, bersiva pirsên beşdaran hate dayîn. Ji pirsên ku hatin kirin, gelo di navbera partiyê û rêjîmê de hevdîtinên hatin kirin an ne. Miwefeq El-Ehmed wiha bersivand, "Heya niha tu hevdîtin pêk nehatiye, lê em bi çareseriya siyasî bawer in û ji bo rawestandina rijandina xwînê em amade ne bi her aliyan re diyalogan bikin."

(bb)

ANHA