Yekemîn Konferansa Hêzên Ewlekariya Hindirîn hate lidarxistin

REQA

Bi beşdarbûna bi sedan endamên Hêzên Ewlekariya Hindirîn ên herêmên Bakurê Sûriyê, Yekemîn Konferansa Hêzên Ewlekariya Hindirîn a Bakurê Sûriyê vê sibehê li stada Firat a bajarê Reqayê hatibû destpêkirin.

Li cihê konferansê al û wêneyên têkoşerên Hêzên Ewlekariya Hindirîn, Hêxzên Asayîşê, HAT û Polîsên Trafîkê hatin dalqandin.

Konferans bi deqeyeke rêzgirtinê destpê kir. Paşê Fermandara Hêzên Ewlekariya Hindirîn a Bakurê Sûriyê Nûjiyan Hesen axivî û konferansa li endamên Hêzên Ewlekariya Hindirîn pîroz kir. Nûjiyan hêvî kir ku konferans bi encamên girîng derbarê xurtkirina ewlekariyê herêmê û avakirina pêşerojeke azad bi encam bibe.

Hevserokê Desteya Hindirîn a Kantona Cizîrê Kenan Berekat jî axivî û ev tişte anî ziman, "Bê guman Hêzên Ewlekariya Hindirîn di parastina ewlehiya Bakurê Sûriyê û gelên wê de rola wan sereke ye. Saziya Hêzên Ewlekariya Hindirîn bi hêzên leşkerî re di serî de QSD'ê gelek herêmê ji çeteyan paqij kirin û bi saya wan gelek kesên li warê xwe vegeriyan û di ewlehiyê de ne"

Kenan Berekat hêviya serkeftina konferansê xwest.

Piştî axaftinan, 5 endamê ji dîwana konferansê hatin hilbijartin.

Di konferasnê de rapora salane û rêzikanameya Hêzên Ewlekariya Hindirîn hatin xwendin û guftogokirin. Her wiha pêşniyaran hatin girtin.

Di dawiya konferansê de beşdaran li ser hilbijartina du alan ji bo Hêzên Ewlekariya Hindirîn erê kirin. Yek li jor bi zimanê Erebî û ji jêr bi zimanê Kurdî "Hêzên Ewlekariya Hindirîn" hatî nivîsandin, ev al girêdayî Hêzên Ewlekariyê yên Reqa, Tebqa, Dêrazor û Minbicê. Ala Duyemîn jî li jor "Hêzên Ewlekariya Hindirîn" û li jêr "Asayîş" hatî nivîsandin, ev alî li herêmên din ên Bakurê Sûriyê dê werin bikaranîn.

(bb)

ANHA