Şêniyên Minbicê cejna malbatên Şehîdan pîroz kirin

MINBIC

Şêniyên Minbicê bi boneya Cejna Remezanê serdana goristana Şehîdan kirin. Welatiyan li ser goristanê şêranî li malbatên şehîdan û welatiyan belav kirin. Li goristanê Fermandarê Meclîsa Leşkerî ya Minbicê Mihemed Ebû Adil axivî û di serî de Cejna Remezanê li hemû welatiyan û bi taybet malbatên şehîdan pîroz kirin û ev tişt anî ziman: "Wekî me berê soz daye ku em ê şopdarên riya şehîdan bin, îro careke din em soza xwe dubare dikin ku em ê heta dawî şopdariyên riya şehîdên xwe bin. Em ji vir cejna hemû şervanên di çeperên berxwedanê de pîroz dikin."

Endamê Saziya Malbatên Şehîdan Ibrehîm El-Xilê û Hevseroka Melcîsa Rêveber a Rêveberiya Sivîl a Demokratîk a Minbic û gundên wê Nezîfa Xelo jî axivîn. Di axaftinan de cejna Remezanê li hemû gelê Sûriyê hate pîrozkirin û şehîdên azadiyê yên ji bo parastina welat canê xwe fedakirin, hatin bibîranîn.

Şevê din jî welatiyên Minbic û endamên Meclîsa Leşkerî ya Minbicê serdana goristanên şehîdan kiribûn û finid li ser goran pêxistin.

Welatiyên Minbicê her wiha di roja cejnê de serdana gorên xizmên xwe yên sivîl jî kirin.

ANHA