Gelê Kobanê cenazeyê şehîd Ehmed Reqa oxir kirin

KOBANÊ

Girsey gel, nûnerên Rêveberiya Xweser, Fermandara QSDʹê Rojda Felat û bi dehan şervanên YPG/YPJʹê cenazeyê şehîd Ehmed Reqa wergirtin û ber bi goristana Şehîd Dicle ve ketin rê.  

Li goristanê merasîma oxirkirinê bi toraneke leşkerî dest pê kir. Piştre Serokê Desteya Parastinê ya Kantona Kobanê Ismet Şêx Hesen axivî, bal kişand ser berxwedana YPG/YPJʹê di şerê li dijî dagirkeriya Tirk de û got ku dê dawiya dagirkeriyê li Efrînê be. 

Hesen anî ziman ku dê yekîtiya gelan li hember dagirkeriyê bi ser bikeve û soza şopandina riya şehîdan heta avakirina Sûriyeke azad û demokratîk nû kir.  

Hevserokê Desteya Rêveberiya Herêmî û Şaredariyan Şêx Ehmed jî axivî û êrîşên dewleta Tirk ên li dijî Bakurê Sûriyeyê şermezar kirin. Ehmed diyar kir ku ew ê têkoşînê bidomînin, serkeftinan bi dest bixin û armancên şehîdan pêk bînin. 

Piştî axaftinan, nasnameya şehîd hat xwendin radestî malbata wî hat kirin. Her wiha Meclîsa Malbatên Şehîdan nasnameyên 10 şehîdên Berxwedana Serdemê eşkere kirin. 

Di dawiyê de cenazeyê şehîd Ehmed Reqa li goristanê hat veşartin.

(mm)

ANHA