Koçberên Kampa Ebû Xeşeb di rewşeke zehmet de jiyan dikin

FÎRAS TEYAWÎ / DÊRAZOR

Rewşa koçberan li kampa Ebû Xeşeb a herêma Dêrazorê gelekî zehmet e. Saziyên alîkariyên mirovî alîkariyan pêşkêş nakin û nan û şîr pir kêm e, koçber nikarin peyda bikin.

Ajansa me ji bo rewşa koçberên di kampê de ji nêz ve bişopîne berê xwe da kampê û bi rêveberiya kampê û koçbera re hevdîtin pêk anî. Herdû aliyan jî destnîşan kirin ku pêwîstiyên jiyanî û alîkarî gelekî kêm têne peydakirin û ev yekê rewşa wan a jiyanî zehmet kiriye.

Koçberê bi navê Ehmed El-Xalid ê ji bajarê Dêrazorê ye derbarê rewşê de wiha got: "Jiyana me di kampê de pir zehmet e. nexweşiya leşmaniya di nava zarok û bapîran de belav bû ye. Ti rêxistin alîkariyan pêşkêş nakin. Di heman demê de zarokên me ji mafê xwe yê perwedeyê bê par mane."

El-Xalid, her wiha destnîşan kir ku bi hatina demsala havînê re rewşa wan hîn zehmetir dibe û wiha dom kir: "Kon têra me nakin. Her deh kes di bin konekî de jiyan dikin, em daxwaz dikin ku hejmara konan were zêdekirin. Di heman demê de dermanên vedana mar û dolpiyan jî pêwîste. "

Endamê Rêveber ê Kampê Sedan El-Ebûd jî derbarê mijarê de wiha got: "Rewşa kampê pir zehmet e. Koçber kêmbûna xizmetan gazinc dikin, rêxistinên alîkariyan erka xwe pêk nayînin û alîkariya koçberan nakin. Kon kêm in, hejmara koçberan zêde ye. Konên heyî têra hejmara zêde ya koçberan nake."

El-Ebûd, her wiha destnîşan kir ku derman û xwarin ji zarokan re pêwîstin û wiha dom kir: "Tevî ku Heyva Sor a Kurd alîkariyan pêşkêş dike, lê derfetên wan kêm in û têra koçberan nake."

El-Ebûd di dawiya axaftina xwe de jî destnîşan kir ku rewşa mirovî ya koçberan pir dijwar e û wiha pê de çû: "Ji sedî 70 zarokên di kampê de kêmxwariniyê jiyan dikin. Şîr û nan nayê peydakirin. Banga me ji rêxistinên mirovî re ku alîkariya me bidin da ku parastina zarokan bikin."

Piraniya koçberên di kampa Ebû Xeşeb de dimînin ji ber rêjîma Sûriyê û DAIŞ'ê koçber bûne û hatine cihên bi ewle yên hêzên QSD'ê rizgar kirine.

Kampa Ebû Xeşeb li gundê Ebû Xeşeb a Dêrazorê hatiye vekirin. Di kampê de hezar û 500 koçber hene. Kamp di 13'ê cotmeha 2017'an de hate vekirin.

(dc)

ANHA