ʹJi ber em gelekî ku koletiyê qebûl nake, em rastî komployan tênʹ

Endamê Rêveberiya TEV-DEMʹê Hisên Koçer da zanîn ku dîroka şerên li Rojhilata Navîn rû didin, nîşan didin ku dewletên mezin dixwazin xêr û bêra herêmê desteser bikin. Koçer wiha got, ʺJi ber ku em koletiyê qebûl nakin em rastî komployan tên. Ji bilî berxwedanê tu çareya me nîne.ʺ

29 adar, 2018 19:00

QAMIŞLO – TEV-DEM bi şêniyên gundên Aliyan ên herêma Dêrikê re civiyan û rewşa siyasî ji wan re nirxandin.

Di civînê de bi dehan gel, endamên Saziyên Civaka Sivîl amade bûn. Civîn bi rêzgirtinê dest pê kir. Piştre Endamê Rêveberiya TEV-DEMʹê Hisên Koçer axivî, rewşa siyasî û rewşa Efrînê nirxand. Koçer wiha got, ʺDewleta Tirk dixwaze wekî Osmaniyan herêmên me dagir bike. Ji ber vê yekê êrîşî gelan dike û wan di komkujiyan re derbas dike. Her wiha demografiya herêmê diguhere.ʺ

Koçer anî ziman ku projeya dagirkeriyê ku dewletên mezin dixwazin li herêmê pêk bînin ne tenê Efrîne û wiha domand, ʺDema mirov vegera dîroka gelên Rojhilata Navîn, mirov dibîne ku şerên cîhanê yên yekemîn û duyemîn li ser axa Rojhilata Navîn pêk hatine. Li hember zulm û koletiyê me riya berxwedanê hilbijratiye da em jiyaneke bi rûmet bijîn. Divê em li hember planên dijmin hişyar bin.ʺ

Civîn bi nîqaşan û bersivdayîna pirsên beşdaran bi dawî bû.

(mm)

ANHA