Li koçberiyê xuliqkarî rengê berxwedana Efrînê nîşan dide

SOLÎN REŞÎD- CEFER CEFO

ŞEHBA- Ji ber êrîşa Artêşa Tirk û çeteyên wê ya li ser kantona Efrînê bi dehezaran welatiyên Efrînê berê xwe dan kantona Şehba. Welatiyan hemû tişt li pey xwe hiştin û xwe û zarokên xwe ji komkujiyên dewleta Tirk û çeteyên wê rizgar kirin.

Welatiyên hatine Şehbayê bê mural nebûn û bi baweriya ku dê di demeke nêzîk de herêmên wan rizgar bikin û vegerin warê xwe, dest bi kar û xebatên xwe kirin. Di vî warî de welatiyan cihên kar ji xwe re peyda kirin û li gorî şert û mercan xulikarî pêş xistin.

Ciwanê Efrînî yê bi navê Mihemed Hemîd bi derfetên xwe yê heyî konek li bin dareke ku li ser rê veda û di dest bi temîrkirina motorsklêtan kir. Hemîd, bi berhemê wê pêdiviyên jiyanî yên malbata xwe pêk tîn e.

Ajokarên motorsklêtan berê xwe didin mihemed û li gel wî motrisklêtên xwe temîr dikin. Hemîd, derbarê mijarê de wiha got: "Ji ber êrîşên Artêşa Tirk û çeteyên wê em neçar bûn ji xaka xwe derkevin. Bi awayekî hovane êrîşî warê me dikirin û em neçarî derketinê kirin."

Hemîd, da zanîn ku wî gelek hewldan kir ku dikanekê peyda bike û tê de karê xwe pêk bîne û ev tişt anî ziman: "Min dikanek peyda nekir, lewma min li bin vê dare kon veda û karê xwe tê de pêk tîn im."

(dc)

ANHA