Xelkê Til Temirê derket xwepêşandanê

Şêniyên bajarê Til Temirê derketin xwepêşandanê û daxwaz kir ku pirsgirêkên wan ên xizmetguzarî, ewlehî û aborî werin çareserkirin.

ROJANE

12 tebax, 2026 12:10

HESEKÊ

Li bajarê Til Temirê gel li Kolana Şehîd Omer Baravê derket xwepêşandanê. Di xwepêşandanê de pirsgirêkên xwe yên xizmetguzarî, aborî, ewlehî û bihabûna madeyên sotemeniyê anîn ziman.

Di xwepêşandanê de daxuyanî hat dayîn û ji aliyê cîgirê hevserokên meclisa bajarokê Qibûr El Qeracna Mehmûd Ebdulezîz Mihemed û endama Meclisa Til Temirê Nalîn Sîdo ve hate xwendin.

Di daxuyaniyê de îşaret bi bihabûna kel û pelan, pirsgirêka avê, elektrîkê û madeyên sotemeniyê hate kirin. Her wiha anîn ziman ku li Til Temir û gundewarên wê pirsgirêkên ewlehiyê hene û hate diyarkirin ku ev pirsgirêk bandorê li çûyîn û hatina şêniyên herêmê dike û ew nikarin rehet tev bigerin û xebatên xwe yên rojane bikin.

Şêniyên Til Temirê di berdewama daxuyaniyê de ji aliyên têkildar daxwaz kir ku pirsgirêkên wan ên ewlehî, xizmetguzariyê wekî av, elektrîk û sotemeniyê çareser bikin, binesaziya gundên ziyan dîtiye çêkin da ku koçber vegerin gundên xwe.

(np)

ANHA