Xelkê Şêxmeqsûdê şehîd Zeyneb Ebdulqadir oxir kir

Xelkê taxên Şêxmeqsûd-Eşrefiyê û koçberên Efrînê yên Helebê cenazeyê têkoşer Zeyneb Mihemed Ebdulqadir li Goristana Pino defin kir.

ROJANE

25 cotmeh, 2025 17:09

HELEB

Gelê taxên Şêxmeqsûd û Eşrefiyê, koçberên Efrînê, endam û nûnerên partiyên siyasî û saziyên sivîl cenazeyê têkoşer Zeyneb Mihemed Ebdulqadir ku bi welatparêziya xwe dihat naskirin, li Goristana gundê Pino defin kir.

Têkoşer Zeyneb Mihemed Ebdulqadir di encama nexweşxiyek demdirêj de duh şehîd bû. Zeyneb dayika 6 zarokan e û di bîrewariya xelkê her du taxan de xwedî helwestên welatparêzî yên zindî ye. Zeyneb di berxwedana 6ˊê Cotmehê (2025) ya li dijî hêzên hikumeta veguhêz a Sûriyeyê de jî beşdar bûbû.

Karwanê oxirkirinê, ji pêş Nexweşxaneya Şehîd Xalid Fecir a li taxa Şêxmeqsûd a Helebê bi rê ket, li kolanên taxê geriya.

Dema karwan gihîşt Goristana gundê Pino ya li herêma Şiqeyêf merasîma oxirkirinê dest pê kir. Li wir endama Kongra Star Leyla Horo axivî û got divê mirov xwedî li nirxên şehîdan derkeve, di têkoşînê de israr bike û kesayeta şehîd Bêrîtan esas bigire.

Di dawiyê de cenazeya şehîd Zeyneb di nava tilîliyên dayikan de li Goristana gundê Pino hat definkirin.

(fr)

ANHA