Xelkê Reqayê sersaxî da malbata şehîdê HREˊyê

Xelkê Reqayê, endamên Meclisên Malbatên Şehîdan, Meclisa Leşkerî ya Reqayê, nûnerên ji Rêveberiya Xweser a Herêma Bakur û Rojhilatê Sûriyeyê, Desteya Ciwan û Werzîşê, partiyên siyasî û Meclisa Rêveber a Kantona Reqayê berê xwe da konê sersaxiyê yê şehîd Ebdurehman El Sofî û sersaxî da.

Şervan Dilşêr Serêkaniyê (Ebdurehman El Sofî) tevî şervanên Hêzên Rizgariya Efrînê; Çîçek Kobanê (Sewsen Berekat), Cûdî Gabar (Cemîl Silêman), Cûdî Reşo (Hemîd Reşo) û Jiyana Efrîn (Roşîn Efrîn) di 30ˊyê Çileyê de şehîd bûn. Wan şervanan li dijî leşkerên dewleta Tirk a dagirker û çeteyên wê li gundê Basilê yê Efrînê di çarçoveya qonaxa duyemîn a Berxwedana Serdemê de çalakî pêk anîn û şehîd bûn.

Di merasîmê de hevserokê Meclisa Malbatên Şehîdan a Kantona Reqayê Ehmed El Hemod axivî û wiha got: "Em îro hatin vir ku sersaxiyê bidin malbata şehîd Ebdurehman. Şehîd di oxira parastina welat û xaka xwe de canê xwe da."

El Hemod wiha domand: "Şehîd Ebdurehman rêya şehadetê hilbijart. Ew kurê Serêkaniyê ye û tev li têkoşîna çekdarî bû û li Efrînê şer kir. Em dibînin kurê Efrînê li Dêrazorê jî şer dike. Ev nîşaneya biratiya gelan e ku Rêber Abdullah Ocalan banga wê kiriye. Em soz didin ku rêça şehîd û tevahî şehîdên din heta pêkanîna serketinê bişopînin."

Dûre endamê Meclisa Rêveber Elî El Şieyib axivî û wiha got: "Em sersaxiyê ji vî lehengî re ku canê xwe di oxira gel û xaka xwe daye de didin. Van lehengan di oxira em bi azadî û aştî bijîn canê xwe da."

El Şieyib wiha domand: "Dema dewleta Tirk li hember berxwedana me aciz bû, bi balafirên bêmirov lehengên me bombebaran kirin. Ebdurehman û şehîdên din di oxira em bi azadî û ewle bijîn de canê xwe da."

Di dawiyê de hevserokê Meclisa Malbatên Şehîdan a kantona Reqayê Ehmed El Hemod wesîqeya şehîd xwend û radestî malbatê kir.

(fr)

ANHA