Urdunê li Sûriyeyê êrişên hewayî pêk anîn

Artêşa Urdunê ragihand duh (duşemê) plana bi dehan qaçaxçiyên alîgirên Îranê têk biriye, dema hewl dane dikên moşekan, mayîn û teqemeniyê derbasî Urdunê bikin.

Li gorî çavkaniyên ku rewşa li başûrê Sûriyeyê dişopînin, balafirên şer ên Urdunê, dever û nuqteyên bazirganiya narkotîkê lê tê kirin ên li Sûriyeyê kirine hedef.

Çavkaniyan diyar kir ku balafiran di êrişan de, malek li bajarokê Selxed ê parêzgeha Siweydayê bombebaran kiriye ku guman hene ya bazirganekî narkotîkê ye. Li aliyekî din jî nuqteyên qaçaxçiyan li parêzgeha Derayê bombebaran kirine.

Navenda Çavdêriya Mafên Mirovan a Sûriyeyê (SOHR) jî da zanîn ku agahî hene duh di êrişeke Urdunê de bazirganekî narkotîkê yê nêzî Hizbullahê û hikumeta Şamê hatiye kuştin.

SOHR`ê li ser X’ê ev agahî da: “Agahî hene ku bazirganê narkotîkê yê bi navê Nasir Feysel El Sadî yê nêzî Hizbullaha Lubnanê û saziyên ewlehiyê yên Şamê di êrişeke hewayî de li dijî herêma Selxed a Siweydayê hatiye kuştin û îhtîmal heye Urdunê ev êriş pêk anîbe.”

Hin rayedaran demeke berê gotibû ku artêşa Urdunê plan dike darbeyan li Sûriyeyê li dijî komên çekdar ên girêdayî bazirganiya narkotîkê û baregehên wan pêk bîne, ji bo ku rê li pêşiya bazirganiya narkotîkê bigire.

(şx)