Têkildarî bandora teknolojiyê ya li ser civakê de civînek hat lidarxistin

Partiya Sûriyeya Pêşerojê têkildarî bandorên neyînî û erênî yên pêşkeftina teknolojîk, li bajarê Holê civînek li dar xist.

15 cotmeh, 2025 13:46

HESEKÊ

Partiya Sûriyeya Pêşerojê ya bajarê Holê yê kantona Cizîrê, bi sernavê "Bandorên Pêşketina Teknolojiyê li ser Civakê” civînek li dar xist. Endamên partiyê û şêniyên bajêr tev li civînê bûn.

Piştî deqeyeke rêzgirtinê ji rêveberên Partiya Sûriyeya Pêşerojê Fatma El Hisn, li ser aliyên neyînî û erênî yên pêşkeftina teknolojîk axivî. Fatmayê destnîşan kir ku bikaranîna berfireh a teknolojiyê hiştiye ku têkiliyên civakî kêm bibin, her wiha bandora rasterast li ser zarokan heye ku demên dirêj li ber ekranan derbas dikin, ev jî dibe sedema qelsbûna têkiliya wan a civakî.

Fatmayê diyar kir ku feydeyên teknolojiyê jî hene ku têkiliya hevgihînê di navbera mirovan de li bajar û welatên cuda hêsan kiriye, her wiha mirov dikarin bi hêsanî agahiyan biweşînin û wergirin. Fatmayê got bikaranîna teknolojiyê derfetên fêrbûnê hêsan û zêde kiriye.

Beşdarên civînê jî nêrînên xwe der barê mijarê de anîn ziman û got divê malbat der barê bikaranîna teknolojiyê de werin hişyarkirin.

(k)