Sersaxî ji malbata şehîd Hisên El Cezaî re hat xwestin

Şandeyeke meclisên leşkerî û sivîl ên Girê Spî, nûnerên partiyên siyasî, malbatên şehîdan û bi dehan hevalên şehîd, her wiha bi sedan şêniyên Girê Spî û Eyn Îsayê yên kantona Firatê sersaxî ji malbata şehîd Hisên Hemûd El Cezaî re xwest.

Konê sersaxiyê li ber mala şehîd a li Eyn Îsayê hat vedan. Di bin kon de merasîmek hat lidarxistin. Di merasîmê de cîgirê hevserokatiya meclisa Girê Spî Hezaî Mihemed sersaxî ji malbata şehîd re xwest û got: “Hisên El Cezaî canê xwe ji bo azadiya gelê xwe feda kir û li hemberî alava şer a wêranker a dewleta Tirk a dagirker sekinî."

Hezai Mihemed anî ziman ku gelên herêmê dê têkoşîna xwe bidomînin heta herêmên dagirkirî rizgar bikin û wiha domand: "Şêniyên herêmê li hemberî siyasetên qirkirin û asîmîlekirinê yên dewleta Tirk a dagirker erka xwe ya pîroz a parastina rewa pêk tînin û soz didin dê xeta şehîdan bişopîne heta dagirkeriyê têk bibin.”

Şervanê Meclisa Leşkerî ya Girê Spî Hisên Hemûd El Cezaî ji navçeya Eyn Îsayê ye, sala 2002’yan ji dayik bûye û di 19’ê Kanûnê de şehîd bû. Şehîd Hisên Hemûd El Cezaî bi merasîmekê li Goristana Şehîdan a li gundê Hikumeiyê yê li bakurê Reqayê hatibû oxirkirin.

(bb)

ANHA