Şêniyan sersaxî da malbata şehîd Mihemed Omer

Şêniyên Hesekê û endamên Hêzên Ewlekariya Hundirîn ji malbata şehîd Mihemed Omer re sersaxî xwest û teqezî bi hevgirtina li hember komployên li dijî gelên herêmê kir.

10 îlon, 2024 14:30

HESEKÊ

Bi sedan şêniyên bajarê Hesekê, endamên saziyên bajêr û Hêzên Ewlekariya Hundirîn ji malbata şehîd Mihemed Xeyrî Omer re sersaxî xwest. Endamê Hêzên Ewlekariya Hundirîn Mihemed Xeyrî 8`ê Îlonê şehîd bûbû.

Endamê Meclisa Malbatên Şehîdan Ehmed El Berîş di merasîma sersaxiyê de ku li gundê El Abid ê başûrê Hesekê hatiye lidarxistin, axivî û got: "Em ji malbata şehîd re sersaxiyê dixwazin û di kesayeta şehîd Mihemed de tevahî şehîdên azadiyê bi bîr tînin."

El Berîş wiha domand: "Şehadet ji bo her malbatekê serfirazî ye. Em dev ji rêya şehîdan bernadin ku gelek fedakarî kirin."

Endamê Rêveberiya Giştî ya Hêzên Ewlekariya Hundirîn a bajarê Hesekê Idrîs Oso axivî û ji malbata şehîd re sebr hêvî kir û got: "Ev peyama me ji her dijminekî re ye ku parêzvanên vê herêmê hene û berdêl çi dibe bila bibe dê wê biparêzin.”

Oso bang li gelê herêmê kir ku di vê pêvajoya hesas de baldar û hevgirtî bin û soz da ku Hêzên Ewlekariya Hundirîn gel û destkeftiyên şehîdan biparêzin.

(şx)

ANHA