Şehîd Zîlan li 3 bajaran hat bibîranîn

Têkoşer Zîlan (Zeyneb Kinacî) di salvegera şehadeta xwe ya 30‘emîn de li Dêrik, Girkê Legê û Til Temirê hat bibîranîn.

JIN

30 hezîran, 2026 14:44

NAVENDA NÛÇEYAN

Kongra Star bi boneya salvegera 30‘emîn a şehadeta têkoşer Zîlan (Zeyneb Kinacî) çalakiyên bîranînê li Dêrik, Girkê Legê û Til Temirê li dar xistin.

DÊRIK

Çalakiya bîranînê li Navenda Çand û Hunerê ya Dîcle ya bajarê Dêrikê bi amadebûna bi dehan kesî hat lidarxistin.

Piştî rêzgirtinê ji rêveberên Kongra Star Arjîn Amed li ser jiyan û têkoşîna şehîd Zîlan axivî û got: "Bi hezaran jin rêya şehîd Zîlan şopandin. Şehîd Zîlan ji bo pirsgirêka jin û pirsgirêka Kurd jiyana xwe feda kir û li hemberî sîstemên dagirker sekinî. Ji bo jin azad bibin divê em hîn zêdetir bixebitin û tê bikoşin."

GIRKÊ LEGÊ

Kongra Star li hola avahiya Sendîkaya Karkeran a bajarokê Rimêlan civînek li dar xist. Bi dehan xebatkarên saziyên sivîl û şêniyên Rimêlan tev li civînê bûn.

Ji rêveberên Kongra Star Rûken Hesen di civînê de behsa çalakiya şehîd Zîlan kir û got: "Çalakiya fedaî ya şehîd Zîlan di dîroka Kurdistanê de gelekî girîng e. Divê em têkoşîna şehîd Zîlan û hemû şehîdan bidomînin."

Di dawiya civînê de sînevizyon li ser nirxandinên Rêber Abdullah Ocalan ên der barê çalakiya şehîd Zîlan de hat pêşandan.

TIL TEMIR

Kongra Star li avahiya Meclisa Malbatên Şehîdan a bajarê Til Temir çalakiya bîranîna şehîd Zîlan bi rêxistin kir.

Di çalakiyê de endama rêveber a Kongra Star Peyman Efrîn axivî. Di axaftina xwe de behsa têkoşîn û jiyana şehîd Zîlan kir. Her wiha Peyman Efrîn naveroka nameya şehîd Zîlan vegot û behsa şert û mercên sala 1996`an kir.

Di dawiyê de sînevizyon li ser jiyana şehîd Zîlan hat temaşekirin.

Şehîd Zîlan (Zeyneb Kinacî) 10`ê Tebaxê sala 1972`an li gundê Almalî yê girêdayî Melatiya jidayîk bûye. Fakûlteya zanista derûnî li zanîngeha Înono ya Melatiya xwendiye. Sala 1994`an li bajarê Edena yê Tirkiyeyê dest bi xebatê dike û fermî sala 1995 tev li Tevgera Azadiyê bû û derbasî herêma Dêrsimê bû.

6`ê Gulana 1996`an li Şamê hewla hedefkirina Rêber Abdullah Ocalan hate dayîn. Têkoşer Zîlan wekî bersiv li hemberî vê hewldanê di 30‘ê Hezîrana 1996`an de çalakiyek fedaî pêk anî.

(np)

ANHA