Şehîd Zîlan di salvegera şehadeta xwe de li bajarên Cizîrê hat bibîranîn

Di salvegera 29'emîn a şehadeta şehîd Zîlan (Zeyneb Kinacî) de li bajarên kantona Cizîrê çalakî hatin lidarxistin. Şehîd Zîlan di 30'ê Hezîrana 1996'an de li bajarê Dêrsimê wekî bersivekê li hemberî hewldana hedefgirtina Rêber Abdullah Ocalan çalakiyek fedaî li dijî artêşa Tirk a dagirker li dar xist.

Di çalakiyan de festîval, civînên girseyî, berhemên hunerî û panel ji aliyê saziyên jinan û ciwanan ve hatin organîzekirin.

FESTÎVALA 5'EMÎN A ŞEHÎD ZÎLAN LI HESEKÊ

Yekitiya Jinên Ciwan a Herêma Bakur û Rojhilatê Sûriyeyê Festîvala 5'emîn a Şehîd Zîlan a bi dirûşma "Ji bo azadiyê, dem dema pêşengtiyê ye" li hola Werzîşê ya bajarê Hesekê li dar xist.

Di serî de endama Yekitiya Jinên Ciwan Betol El Elî axivî û got: "Bi pêşengtî û têkoşîna şehîd Zîlan jinên Bakur û Rojhilatê Sûriyeyê di hemû aliyan de gihîştin astên bilind."

Nûnera Nivîsgeha Jinan a Desteya Ciwanan û Werzîşê Şeyma Elî jî diyar kir ku şehîd Zîlan ji jinên ciwan re bû pêşeng û wê cewhera fedakariya ji bo azadiya jinan û civakê nîşan da.

Di festîvalê de 6 komên werzîşê beşdar bûn û çaverê ye sibe li hola Serdem a taxa Mişêrfeyê festîval bidome.

DIRBÊSIYÊ: CIVÎNA GIRSEYÎ Û ŞANO

Li bajarê Dirbêsiyê jî Meclisa Jinan a Partiya Yekitiya Demokratîk (PYD) û Kongra Star civîneke girseyî li Navenda Çand û Hunerê li dar xist. Di civînê de şênî û endamên saziyan amade bûn.

Endama Meclisa Jinan a PYD’ê Hemîde Îso di civînê de got: "Şehîd Zîlan wateya girêdan û fedakariyê nîşan da û di berxwedana li hemberî xiyanet û zordestiyê de pêşengtî kir."

Di dawiya çalakiyê de endamên Kongra Star şano li ser jiyana şehîd Zîlan pêşkêş kir û peyama şehîd Zîlan a ji bo Rêber Abdullah Ocalan hat xwendin.

HOL: ŞEHÎD ZÎLAN NIMÛNEYA CESARETA JINÊN AZAD E

Li bajarê Holê jî PYD'ê civîneke girseyî ku tê de bi dehan endamên saziyan amade bûn li dar xist.

Di civînê de hevseroka PYD'ê li Holê Îqbal Ebdo li ser jiyana şehîd Zîlan axivî û got ku çalakiya wê ya fedaî bersiva dijî hişmendiya zordest e.

Rêvebera Kongra Star a bajarê Şedadê Melek Mihemed diyar kir ku şehîd Zîlan bedena xwe kir qurbana fikrên azad û bû sembola têkoşîna jinan.

ŞEDADÊ: ŞEHÎD ZÎLAN KANIYA AZADIYÊ Û NÎŞANA FEDAKARIYÊ YE

Li bajarê Şedadê Kongra Star merasîma bibîranîna şehîd Zîlan li hola meclisa bajêr li dar xist.

Rêvebera Kongra Star Emîra El Seid li ser girîngî û rola çalakiya fedaî ya şehîd Zîlan ku yekemîn çalakiya fedaî ya jinan di dîroka Kurdistanê de bû, axivî û got: "Şehîd Zîlan rêya têkoşîna jinan guhart û nimûneya jina berxwedêr da rûniştandin."

Rêvebera Kongra Star Ruqeye Şilaş li ser jiyana şehîd Zîlan ji zaroketiyê, xwendina zanîngehê, tevlêbûna li nava hêzên gerîla û çalakiya fedaî axivî.

Umeye Hecûb jî got şehîd Zîlan ji bo lêgerîna azadiyê berê xwe çiyayan û peyama wê wiha bû ku bêyî berxwedan azadî tune ye.

BÎRA NEMIR A TÊKOŞÎNÊ

Şehîd Zîlan di 1972'yan de li Bakurê Kurdistanê ji dayik bû û yek ji sembolên berxwedana jinên Kurd e. Di 1995'an de tev li tevgera azadiyê bû û di çalakiya xwe ya fedaî de navê xwe di dîrokê de nivîsand.

(mh/fr)

ANHA