Sayil El Zobaa: Em ê rê nedin tu kesî ewlehiya herêmê têk bibe

Ji dema hilweşîna rejîma berê ya Baasê ve, li Sûriyeyê valahiyeke ewlehiyê ya mezin çêbû ku rê da çeteyên DAIŞ'ê ji nû ve kom bibin û tevliheviya ewlehiyê bi kar bînin da ku êrişan li Bakur û Rojhilatê Sûriyeyê bidin destpêkirin.

Der barê mijarê de cîgirê berdevkê QSD`ê Sayil El Zobaa ji ajansa me re axivî.

Sayil El Zobaa diyar kir ku piştî valahiya ewlehiyê û nebûna aliyên bibandor di nav hikûmeta veguhêz de ku dijî çeteyên DAIŞ'ê şer bikin, QSD bi tenê berpirsiyarê şerê li dijî DAIŞ`ê hilgirtiye.

El Zobaa got: "Ji dema hilweşîna rejîma Sûriyeyê ve, çeteyên DAIŞ'ê hewl didin ku xwe li herêmê kom bikin û erdnîgarî û hêza xwe ji nû ve bi dest bixin."

El Zobaa destnîşan kir ku çeteyan ji destpêka salê ve li Bakur û Rojhilatê Sûriyeyê zêdetirî 160 êrş pêk anîne, ku hêzên leşkerî, rûmetdar, sivîl û hemî kesên ku di saziyên Rêveberiya Xweser a Demokratîk de dixebitin kirine hedef.

El Zobaa da zanîn ku ajendayên derve hene ku piştgiriyê didin DAIŞ'ê û wiha domand, "Hemû cîhan dizane DAIŞ`ê ji hêla kî ve tê piştgirîkirin. Armanca wan ew e ku aramiya Bakur û Rojhilatê Sûriyeyê bi giştî têk bibin."

El Zobaa li ser peymana 10'ê Adarê axivî û got: "Xala yekem a peymana ku di navbera fermandarê giştî yê QSD’ê Mezlûm Ebdî û Ehmed El Şerii de hatiye imzekirin, agirbest e. Lê ev pêk nehat, ji ber ku agirbest ji hêla hêzên hikûmeta veguhêz ve hate binpêkirin."

El Zobaa wiha lê zêde kir: "Hin alî dixwazin ewlehî û aramiya li Sûriyeyê têk bibin, hin aliyên din jî dixwazin welêt wekî rehîneyê nakokiyên mezhebî, şerên navxweyî û parçebûnê bihêlin. Em bi cudaxwaziyê hatine tawanbarkirin, lê em ne cudaxwaz in. Em pabendî yekîtîya axa Sûriyeyê û aştiyê ne."

Sayil El Zobaa destnîşan kir ku QSD`ê xwedî ezmûn û hêz e û dikare bi çeteyên DAIŞ'ê re mijûl bibin, lê êrişên dawîn nîşan didin ku DAIŞ`ê hewil dide  xwe ji nû ve rêxistinkirina bike û hebûna xwe vejîne. Êrişên wan di demên dawî de li dijî deverên Bakur û Rojhilatê Sûriyeyê zêde bûne.

El Zobaa destnîşan kir ku QSD`ê xwedî yekîneyên taybet e ku ji bo mijûlbûna bi çeteyên DAIŞ'ê re hatine perwerdekirin. Her wiha da zanîn ku tedbîrên ewlehiyê yên berfireh hatine girtin, xalên kontrolê hatine zêdekirin û şaneyên ku li herêmê hatine bicihkirin têne şopandin.

Sayil El Zobaa diyar kir ku QSD'ê berî demekê serkirdeykî çeteyên DAIŞ'ê girtiye û got: "Ji dema hilweşîna rejîma Sûriyeyê heta îro, QSD'ê zêdetirî 95 çeteyên DAIŞ'ê girtine.”

Di dawiya axaftina xwe de, cîgirê berdevkê QSD’ê Sayil El Zobaa peyamek da pêkhateyên herêma Bakur û Rojhilatê Sûriyeyê û diyar kir ku erkê hêzên wan ew e ku ewlehî û aramiya herêmê biparêze, û dê li hember her kesê ku hewl bide ewlehiyê têk bibe, bisekine.

(k)

ANHA