Şaredariya Amûdê civîna xwe ya salane li dar xist

Şaredariya Gel a Amûdê ya kantona Cizîrê civîna xwe ya salane li dar xist. Endam û hevşaredar, endamên saziyên civaka sivîl û hejmareke şênî beşdarî civînê bûn. Civîn li hola Meclisa Qanûnsaz a li bajarê Amûdê hat lidarxistin.

Piştre hevşaredara Amûdê Ranya Yûnis axivî û got lidarxistina vê civînê ji bo nirxandina xebatên şaredariyê, guhdarîkirina pêşniyarên şêniyan û nûnerên saziyan û pêşxistina xizmetan girîng e.

Piştre rapora rewşa siyasî hat xwendin. Di raporê de rewşa Sûriyeyê ya piştî rûxandina rejîma Baasê, êrişên hêzên hikumeta veguhêz ên li ser Bakur û Rojhilatê Sûriyeyê, hedefkirina nuqteyên QSD’ê hatin nirxandin. Hate gotin, ev kiryar ku binpêkirina mafên şêniyan e, hişmendiya biçûkxistin û paşguhkirinê nîşan dide.

Cîgira hevşaredarên Amûdê Întîsar Şakir rapora xebatên salekê yên şaredariyê xwendin.

Li gorî raporê ji xebatên hatin kirin: qîrkirin û sererastirina rêyan, ronîkirina rêyên giştî bi enerjiya tavê, lidarxistina pêngavên paqijkirinê û çandina daran, avakirina bîrekê, avakirina rogaran û serekirina torên kanalîzasyonê li ser gelek rêyan.

Di raporê de kêmbûna derfetan wek zehmetiyên li pêşiya pêkanîna hin xebatan hat destnîşankirin û banga tevkariyê li şênî û saziyan hate kirin.

Di raporê de plansaziya dema pêş jî hate destnîşankirin. Ji xebatên ku dê werin kirin ev in: Avakirina sûkeke sebzeyan û guhertina cihê wê yê heyî, avakirina benzînxaneyekê li herêma pîşesaziyê, temamkirina projeya avakirina sînemayê.

Piştre nêrîn û pêşniyarên beşdaran hatin guhdarkirin. Beşdaran girîngiya başkirina rêyan û qîrkirina wan, zêdekirina eleqeya bi paqijiya giştî û parastina jîngehê vegotin.

Di dawiya civînê de sînevîzyonek li ser xebatên sala borî yên şaredariyê hat pêşandan.

(bb)

ANHA