’Salane 50 jin li Başûrê Kurdistanê tên qetilkirin’

Rêxistina Serbixwe ya Jinan der barê qetilkirin û binpêkirinên ku li Başûrê Kurdistanê li beramberî jinan pêk tên de daxuyaniyek belav kir.

Di daxuyaniya Rêxistina Serbixwe ya Jinan de hatiye diyarkirin ku li Başûrê Kurdistanê her cûre cudakarî û bêrêzî li hember jinan bi awayekî rêxistinkirî tê kirin, di aliyê civakî, yasayî û medyayê de jî mijara pirjiniyê wekî ku tiştek giring be tê behskirin.

Di dewama daxuyaniyê de hatiye gotin ku destdirêjiya zayendî û teşwîqkirina tundûtûjiyê ji platformên fermî yên partiyên desthilatdar, medyayê û medya dijîtal wek jehrê tê rijandin û jin tên biçûkxistin.

Her wiha hatiye diyarkirin ku pêşxistina çanda mêrsalarî, olî, namûsperestî û cûdakariya ku ji aliyê desthilatê ve tê kirin, bûye sedema kuştinên jinan.

Di daxuyaniyê de hatiye destnîşankirin ku bûyerên kuştina jinan bûye yek ji pirsgirêkên herî qirêj a nava civakê û lekeyek reş li ser rûyê desthilat û sîstema baviksalariyê hiştiye.

Hatiye gotin ku li gor amarên fermî yên saziyên hikûmetê, salane 50 jin li Başûrê Kurdistanê tên qetilkirin, hinek ji wan tên veşartin û wek bûyerên, xwekuştin û xwe şewitandinê tên ragihandin.

Di dawiyê de jî Rêxistina Serbixwe ya Jinan daxwaz ji jinan û mêran dike ku bi hev re ji bo civakek azad û wekhev bixebitin.