Rustem Cûdî fermandarê ku têkoşîna siyasî bi ya rewşenbîrî re kir yek

Di 10`ê Cotmeha 2011`an de, Tevgera Azadiya Kurdistanê şehadeta endamê Komîteya Rêveber a Koma Civakên Kurdistanê (KCK) û endamê Komîteya Navendî û Konseya Leşkerî ya Partiya Karkerên Kurdistanê (PKK), Rustem Cûdî digel çend fermandarên din ên Komîteya Leşkerî ya Hêzên Parastinê, di êrişa hewayî ya Tirkiyeyê ya li ser herêmên Xnere û Xakûrkê yên başûrê Kurdistanê di 27ê Îlona 2011an de ragihand.

Têkoşer Rustem Cûdî, ku navê wî yê rastî Rustem Yusuf Osman bû, di sala 1965an de li gundê Xirbet Dibs, nêzîkî bajarê Serêkaniyê ji dayik bû. Ew di malbateke Kurd de mezin bû ku bi pabendbûna xwe ya bi doza neteweyî ya Kurd tê nasîn.

Cûdî xwendina xwe ya seretayî, navîn û amadeyî li Serêkaniyê temam kir, dû re çû Şamê da ku zanistên çandiniyê bixwîne, li wir endamê partiya çepgir a Kurd bû.

Di sala 1987an de, li Şamê beşdarî semînerek rêber Abdullah Ocalan bû, piştî wê tevlî Tevgera Azadiya Kurdistanê bû û berî ku dest bi çalakiyên xwe yên siyasî û rêxistinî bike, li Akademiya Şehîd Masûm Korkmaz perwerde dît.

Cûdî paşê di navbera çend deverên çiyayên Kurdistanê de geriya û li herêmên Botan, Gabar û Bişêriyê rolên fermandariyê girt ser xwe. Di sala 1998an de, di nav Kurdên ku li komarên Yekîtiya Sovyetê ya berê dijîn de erkên rêxistinî pêk anîn.

Di sala 2003an de, têkoşer Rustem Cûdî ji bo serokatiya Kongreya Gelê Kurdistanê hate hilbijartin û beşdarî gelek çalakiyên siyasî û rêxistinî bû.

Ji bilî çalakvaniya xwe ya siyasî, Rustem Cûdî bi xebatên xwe yên rewşenbîrî û çandî dihat nasîn û gelek lêkolîn û nivîs li dû xwe hişt, bi taybetî pirtûkên "Îdeolojî" û "Rojhilata Navîn" û her weha bi dehan gotar û lêkolîn.

Di salvegera şehadeta wî de, derdorên siyasî û çandî yên Kurd jiyan û xebata Rustem Cûdî wekî kesayetiyek ku têkoşîna siyasî bi lêgerîn û lêkolînên rewşenbîrî re kir yek û di dehsalên borî de bandorek mayînde li ser tevgera Kurd hişt, bi bîr tînin.

(k)

ANHA